Álisher Kárimov «Jańa tolqynda» Adrıano Chelentanonyń «Confessa» ánin oryndaıdy

Atalmysh baıqaýdy «Qazaqstan» respýblıkalyq teleradıokorporatsııasy Qazaqstan aýmaǵynda tikeleı efırde translıatsııalaýdyń aıryqsha quqyǵyn alǵash ret ıelenip otyr. Án baıqaýy 22 shildede Latvııanyń ıÝrmala qalasynda bastaldy. Ol 27 shildege deıin jalǵasady, dep habarlaıdy «Qazaqstan» RTRK» AQ baspasóz qyzmetinen.

Tikeleı efırdegi translıatsııany qazaq tilinde belgili jýrnalıst Ashat Sadyrbaı júrgizedi. Onymen birge «Dzıntarı» kontserttik zalynyń sahnasyndaǵy baıqaý týraly otandyq estrada juldyzdary Jeńis Ysqaqova, Altynaı Jorabaeva men Gúlnur Orazymbetova habarlap turady.

2014 jyly álemniń 45 memleketinen 15 000 jas talanttar baıqaýǵa qatysý týraly ótinim bildirgen bolatyn. Alaıda aqtyq saıysqa 13 memleketten 16 qatysýshy ǵana ótip, baq synasady.

Atalǵan halyqaralyq baıqaýda Qazaqstannyń atynan Álisher Kárimov óner kórsetpek. Ol 2005 jyly Superstar.kz jobasyna qatysyp, tanymal boldy. Budan buryn da halyqaralyq baıqaýlarǵa qatysyp, 2001 jyly Vıtebsk qalasynda «Slavıan bazary» XX halyqaralyq óner festıvaline qatysyp, úshinshi oryn ıelenip, «Reseıdiń BAQ-nyń arnaıy júldesine» ıe boldy. Sondaı-aq Álisher «World Champion ships of Performing Arts», AQSh (2007 jyl) nagradasynyń jáne «Erevan shaqyrady-2012» halyqaralyq pop mýzyka festıvaliniń úshinshi ornyn ıelengen bolatyn. Jaqynda ánshi «Shúkir» atty úshinshi albomyn jaryqqa shyǵardy.

Resmı jerebe tastaý qorytyndysy boıynsha, Álisher birinshi konkýrstyq kúni 16-shy, ekinshi konkýrstyq kúnde 15-inshi, úshinshi kúni 6-shy nómirmen sahnaǵa shyǵady.

Qazaqstan bıyl bul baıqaýǵa 12-shi ret qatysýda. Ár jyldary elimizden Dılnaz Ahmadıeva, Maqpal Isabekova, Aıqyn Tólepbergen, Qaırat Túntekov sııaqty ánshiler men Rin'Go toby qatysqan bolatyn.

Á.Kárimovtiń prodıýseri Altynbek Rahmetovtiń habarlaýynsha, baıqaýdyń alǵashqy kúni «Álemdik hıt» taqyrybynda Álisher Adrıano Chelentanonyń (Adriano Celentano) «Confessa» ánin oryndaıdy. Baıqaýdyń ekinshi kúni ánshi «Jańa tolqyn - 2010» baıqaýynyń ekinshi oryn ıegeri ýkraındyq oryndaýshy Tatıana Shırkomen dýette án shyrqaıdy. Baıqaýdyń úshinshi kúni «Premeralar kúni» dep atalady. Qatysýshylar jańa ánder oryndaýǵa mindetti. Álisher kópshiliktiń nazaryna «Árıne» ánin usynbaqshy. Bul ándi arnaıy osy baıqaýǵa jas aqyn Talant Arǵynǵalı men kompozıtor Ǵalymbek Ismbergenov jazǵan bolatyn. Álisher ánniń birinshi bóligin qazaq tilinde oryndasa, ekinshi bóligin orys tilinde oryndamaqshy.

23 shilde kúni kórermender mıllıondardyń súıikti hıttaryn tyńdaı alady. Olardy tanymal ártister F.Kırkorov, Djamal, T.Rodrıgez, A.Kogan, Anı Lorak, «A stýdıo», «Dıskoteka Avarııa» jáne «Serebro» oryndaıdy.

Esterińizge sala keteıik, latvııalyq poshta bıyl «Jańa tolqyn-2014» baıqaýynda Álisher Kárimovtiń sýreti bar marka shyǵardy. Baıqaýǵa qatysýshylardyń sýreti bar marka shyǵarý konkýrs aldynda únemi uıymdastyrylatyn dástúr.

«Jańa tolqyn» tanymal oryndaýshylardyń halyqaralyq baıqaýy tek Reseı men Latvııanyń ǵana emes, sonymen qatar jaqyn jáne alys shetel memleketteriniń aýqymdy mýzykalyq sharasy bolyp tabylady. Saıyskerlerdiń jeńiske umtylýynan, olardyń ónerine mıllıondaǵan telekórermenderdiń qyzyǵýshylyǵynyń oıanýynan «Jańa tolqyn» baıqaýy búkil Eýrazııa kontınentinde jyl saıyn kútiletin mýzykalyq shara bolyp tabylatyny daýsyz.