Álisher Karımov «Erevan shaqyrady» baıqaýynda júldeger atandy

Birinshi oryn Ýkraına ánshisiniń qanjyǵasyna baılansa, grýzııalyq úmitker ekinshi oryndy oljalady, dep jazady «Aıqyn» basylymy.

Baıqaý sharty boıynsha, ár qaty­sýshy úsh ánnen daıyndap kelgen. Al­dymen qazylar alqasy men kórermen­der synǵa túsýshilerdiń álemdik tany­mal týyndylardy qalaı shyrqaıty­nyn synap kórgen. Odan keıin ár oryn­daýshyǵa óz eliniń úzdik ánin pash etýge mursat bergen. Sońynan aqtyq báıgege iriktelip shyqqandar armıan ti­linde múmkindikterin baıqaǵan. Áli­sher tartý etken Tólegen Muhamedjanov­tyń «Іńkárim-aı» ánin sheteldikter úl­ken yqylaspen qabyldaǵan kórinedi.

Esterińizde bolsa, ol bir jyl buryn jıyrmasynshy márte ótken halyqara­lyq «Vıtebsk-2011» estradalyq ánder baıqaýynda da óner kórsetip, úshinshi oryndy ıemdengen bolatyn.

Al «Erevan shaqyrady» baıqaýy bıyl birinshi ret qolǵa alynyp otyr. Aýqymdy shara Armenııa astanasynyń 2794 jyldyǵyna arnalypty.

Dúbirli dodaǵa Ýkraına, Belorýssııa, Malta, Estonııa, Latvııa, Lıtva, Qa­zaqstan, Izraıl, Polsha, Ispanııa, Rý­mynııa, Grýzııa, Reseı, Moldova, Bol­garııa, Ulybrıtanııa sııaqty memleket­tiń jastary jınalǵan. Olardyń basym bóligi «Evrovıdenıe», «X-factor» joba­laryna qatysyp, tájirıbe jınaq­ta­ǵandar. Júlde qoryna toqtalsaq, az da emes, kóp te emes, 20 myń dollardy qu­ra­ǵan. Jeńimpazdar qomaqty qarjymen qosa, zattaı baǵaly syılyqtarmen, arnaıy dıplomdarmen marapattalǵan. Armıan tilinde úzdik án salǵan úmitkerge arnaıy júlde taǵaıyndalypty.

Álisher elimizdiń atyn asqaqtatyp qana qoımaı, óz tyńdarmandary úshin «Taǵy da» dep atalatyn albomyn ja­ryqqa shyǵardy.