Alys joldy atpen eńsergen ata-babamyzdyń janynda bizdiń sapar túkke turmaıdy — túrik saıahatshylary
ASTANA. KAZINFORM — Túrkııanyń Ankara qalasynan Astanaǵa avtobýspen shyqqan Býrak pen Idıl esimdi erli-zaıypty 5400 shaqyrym joldy artqa tastap, dittegen jerge jetti. Jandarynda Gúnesh esimdi balasy jáne Anadoly agenttiginiń tilshisi bar.
Astanaǵa tabany tıe sala meımandar «jettik-aý» dep keń tynystap, aýany qaıta-qaıta juta berdi. Túrlerinen sharshaǵany sezilip-aq turdy.
Árıne, alys joldy avtobýspen eńserý ońaı sharýa emes. Jolda qıyndyqtar da az bolmaǵan.
«Qazaqstannyń dalasy baıtaq eken. Bir qaladan kelesi qalaǵa jetýdiń ózi ájeptáýir ýaqyt aldy. Dese de, dalaǵa kóz tastap, jolda kezdesken ań-qusqa qarap qazaq halqynyń erkindigin, qonaqjaılylyǵyn sezine túskenimiz ras. Jasyratyny joq, keıbir joldardyń sapasy syn kótermeıdi. Oıqy-shoıqy joldar kezdesip jatty. Biraq, avtobýs synyp, ózge de qıyndyqtar týyndaǵan kezde sol jerdiń ákimdigi jedel jetip, qajetti kómekti kórsetti», — dedi Idıl Dýran.
Býrak bul sapar ómirlerinde eń uzaq saıahat retinde tirkelgenin aıtty.
Kóshpendiler oıynyn tamashalaǵan soń Qazaqstannyń ár qalasyn asyqpaı aralap shyǵýdy maqsat etip otyrǵanyn da jetkizdi.
«Bul sapardyń mańyzy zor. Bizdiń ata-babamyz kóshpendi bolǵan, qanshama shaqyrym joldy atpen júrip ótken. Onyń qasynda bizdiń avtobýspen jolǵa shyǵýymyz túkke de turmaıdy. Kóshpendi halyqtyń urpaǵy bolǵan soń arnaıy saıahat uıymdastyryp, patrıottyq rýhymyzdy kótergimiz keldi», — dedi Býrak Dýran.
Saıahatshylardy kútip alǵan Astana qalasy ákimdiginiń ókilderi syı-sııapat kórsetip, Dúnıejúzilik kóshpendiler oıyndarynyń ashylýyna arnalǵan bıletterdi tabystady.
Sondaı-aq, dúbirli doda boıy jol kórsetip otyratyn arnaıy mamandardyń bekitilgenin atap ótti.
Esterińizge salsaq, buǵan deıin túrik saıahatshylarynan arnaıy suhbat alyp, sapardyń mańyzyna úńilip kórgen edik.
