Alyptar saıysy: Sportshylar bir qoıdyń etin taýysa ala ma

ASTANA. KAZINFORM – Dúnıejúzilik kóshpendiler oıyndarynyń baǵdarlamasyna alǵash ret engizilgen Powerful nomad sporty boıynsha alyptar júldege talasyp jatyr. 

Jarys erejesine sáıkes, ár elden 1 sportshy qatysady. Salmaǵy 90 keliden joǵary bolýy tıis.

Jarys bes kezeń boıynsha ótedi:

– 100 keli tasty kóterip, ony 10 metrge jyljytý;

– 100 kelilik qappen otyryp turý;

– 10 kelilik naızany oń nemese sol qolmen 10 metr qashyqtyqta turǵan nysanaǵa laqtyrý;

– 130 kelilik bóreneni ıyǵyna salyp, otyryp turý;

– salmaǵy 200 keli arbany 10 metrge súıreý.

Jarys bastalmas buryn sportshylardan «bir qoıdyń etin jalǵyz ózińiz taýysa alasyz ba?» dep suradyq. Sebebi, sportshylardyń turpatyna qarap as máziri baı bolý kerek ekenin baǵamdadyq.

Sportshylar adam qansha jerden alyp bolsa da bir qoıdyń etin taýysýy qıyn ekenin jetkizdi.

«Bir qoıdyń etin eshkim taýysa almas. Dene alyp bolǵanmen, ót kishkentaı ǵoı», - dedi qyrǵyz sportshysy Ularbek Kúresbekýly.