Alypsatarlar men bıletsizder: Qaırat — Real matchynan soń shaǵym kóbeıdi
ALMATY. KAZINFORM — Áleýmettik jelilerde Almatydaǵy «Qaırat» pen madrıdtik «Real» arasyndaǵy Chempıondar lıgasynyń ekinshi týr oıynyna baılanysty pikir kóbeıdi. Match aıaqtalǵanymen, oǵan qatysty daý-damaı basylmaı tur: ondaǵan jankúıer bıleti bolsa da, stadıonǵa kire almaǵanyn aıtty.
Kórermen tarapynan tarıhı matchqa suranys joǵary boldy. Bıletter bar bolǵany tórt saǵattyń ishinde satylyp ketti. Jankúıerlerdiń kóbi tapsyrysty rásimdeıtin kezde júıeniń isten shyqqanyn aıtyp shaǵymdandy.
Alaıda másele munymen shektelmedi. Keıinirek jelide bıletterdi satý týraly habarlandyrýlar paıda bola bastady. Uıymdastyrýshylar men polıtsııanyń eskertýine qaramastan, match kúni alypsatarlyq tyıylmaldy. Alypsatarlar bıletterdi óz qunynan birneshe ese qymbatqa usynǵan.
Taǵy bir narazylyq týǵyzǵan jaıt — tegin taratylǵan VIP-shaqyrý bıletteriniń satylymǵa shyǵýy. Áleýmettik jelilerde belgili ártisterdiń balalary mundaı shaqyrtýlardy 500-600 myń teńgeden joǵary baǵaǵa satqany aıtyldy.
Sonymen qatar jankúıerler qolynda bıleti bola tura, stadıonǵa kire almaǵanyn jetkizdi.
Kireberisterde uzyn-sonar kezek pen janjal men tóbeles te bolǵan. Kýágerlerdiń aıtýynsha, bıleti joq adamdar da stadıonǵa kirip ketken.
Kazinform redaktsııasy «Qaırat» fýtbol klýby men Freedom Ticketon baspasóz qyzmetterine resmı saýal joldady. Aıta keteıik, bir JSN-men eki bıletten artyq alýǵa bolmaıtyny aıtylǵan.
Freedom Ticketon ókilderi satylǵan bıletter men shaqyrý qaǵazdarynyń naqty sany kommertsııalyq qupııa ekenin aıtty. Al jaramdy bıleti bola tura stadıonǵa kire almaǵandarǵa qatysty kompanııanyń kommýnıkatsııalar jónindegi dırektory Azamat Atageldi bylaı jaýap berdi:
— Ár jaǵdaı jeke qaralady. Jankúıerlerdiń ótinishterin muqııat zerttep jatyrmyz jáne árbir naqty jaǵdaıdyń mán-jaıyn eskere otyryp sheshim qabyldaýǵa daıynbyz. Olar bizdiń qoldaý qyzmetine nemese tikeleı maǵan habarlasa alady. Biz ashyq ári konstrýktıv dıalogqa daıynbyz. Qoldaý qyzmetiniń nómiri: 87719365353 (qońyraýlar men WhatsApp úshin).
Ticketon ókili bıleti joq adamdardyń stadıonǵa kirýi týraly suraqqa:
— Bizdiń júıe arqyly satylǵan barlyq bılet tegis baqylaýda boldy. Bıletterdiń úshinshi tulǵalarǵa qalaı túskeni týraly resmı derek joq. Qaıta satý máselesin muqııat qarastyrýǵa jáne qajet bolǵan jaǵdaıda baqylaý sharalaryn kúsheıtýge daıynbyz. Qoǵam senimi — bizdiń basty qundylyǵymyz. Sondyqtan barlyq jaǵdaı anyqtalǵannan keıin tolyq aqparat beriledi, — dep jaýap berdi.
Azamat Atageldi sonymen qatar kompanııa mamandary júıeni jetildirý, ashyqtyqty arttyrý jáne mundaı jaǵdaılardyń qaıta boldyrmaý sharalaryn ázirlep jatqanyn atap ótti.
— Keshegi oıyn alypsatarlyq pen jalǵan bıletter máselesiniń áli de ózekti ekenin kórsetti. Shyn jankúıerler arsyz adamdardyń qurbany bolmaýǵa tıis. Bıleti joq adamdardyń stadıonǵa jappaı ótýge tyrysqany qaýipsizdikke qater tóndirdi. Aýqymdy is-sharalarǵa qatysý mádenıetin qalyptastyrýymyz kerek: bılettiń joqtyǵy basqa jankúıerlerdiń oıyndy kórýine jáne qaýipsiz ortada bolýyna kedergi jasamaýǵa tıis, — dedi ol.
Al búgin ІІM vıtse-mınıstri Sanjar Ádilov bul jaǵdaıǵa túsinik berdi.
Onyń aıtýynsha, «Qaırat» — «Real» matchy bıletteriniń zańsyz qaıta satylýyna qatysty barlyq shaǵym tekserilip, ár derek boıynsha qajetti shara júrgiziledi.
Aıta keteıik, Chempıondar lıgasynda «Real Madrıd» «Qaıratty» 5:0 esebimen oısyrata jeńdi.