Álipbı aýystyrýdy tildiń ózi talap etip otyr - Jumaǵazy Álpishev

ASTANA. QazAqparat - Memleket bolyp qarastyryp otyrǵan álipbı aýystyrýdyń saıasatqa da, basqaǵa da qatysy joq, eń basty qajettiligin tildiń ózi talap etip otyr. Astana qalasy №56 mektep - lıtseı dırektory Jumaǵazy Álpishev latyn álipbıine kóshýge qatysty osyndaı pikir bildirdi.

«Biz aldaǵy ýaqytta da memlekettik tildi damytý baǵytyndaǵy keshendi jobalardy júzege asyrýdy tabandylyqpen jalǵastyra beremiz.  Qazaq alfavıtin 2025 jylǵa qaraı latyn grafıkasyna kóshirýge daıyndyq jumysyn osy bastan qolǵa alý qajet. Bul qazaq tilin jańǵyrtyp qana qoımaı, ony osy zamanǵy aqparattyń tiline aınaldyrady» - dep QR Prezıdenti N.Nazarbaevtyń Joldaýynda aıtylǵan bolatyn.

 «Qazaq tilin osy zamanǵy aqparat tiline aınaldyrý barysynda qandaı isterdi birinshi kezekke qoıý kerektigi  týraly óz pikirimdi bildirgim keledi. Árıne, bir álipbıden ekinshisine aýysý ońaı sharýa emes. Men sııaqty jasy alpysqa taıaǵan adamdar úshin bul is qıyndyq keltirýi ádben múmkin, biraq bolashyq urpaq úshin biz úlken qoldaý kórsetýimiz kerek. 2025 jylǵa deıin  latyn grafıkasyna kóshirýge daıyndyq jumysyn osy bastan qolǵa alynýyn tolyq qoldaımyn», - deıdi Jumaǵazy Ázenuly.

Ol álipbı aýystyrý kezine qatysty óz usynystaryn ortaǵa saldy,

«Birinshi kezekte, latyn álipbıin oqytatyn arnaıy mamandardy daıyndaýdy qolǵa alý, joǵary oqý oryndarynda, arnaıy pedogogıkalyq kolledjderde mamandardy daıyndaıtyn bólimder ashý, latyn álipbıin tanytýǵa arnalǵan oqý quraldary ulttyq erekshelikterdi eskere otyryp óte saýatty jasalýy kerek.

Álipbı  men jazý máselesine áleýmettik lıngvıstıka turǵysynan jete nazar aýdarǵan jón. Jazý men álipbı máselesi bir-birimen tyǵyz baılanysty bolady», - deıdi elordalyq bilim oshaǵynyń basshysy.

Onyń aıtýynsha, mektep tabaldyryǵyn jańa attaǵan búldirshinder 42 tańbadaǵy kırıllıtsany meńgerýden góri 30-31 tańbaly latyn álipbıin meńgerý jeńilirek bolady.

«Latyn álipbıin engize otyryp, onyń qazaq tiliniń dybystyq tazalyǵyn saqtap qalýǵa, damýyna úles qosýyn únemi qadaǵalýda ustaýymyz kerek

Baı muralar, aqyn - jazýshylardyń klassıkalyq shyǵarmalaryn keler urpaqqa jetkizý maqsatynda latyn álipbıimenen qaıta basyp shyǵarý úshin memleket tarapynan qarajat bólý qarastyrylǵany jón

Osy bastan latyn álipbıine  halyqtyń kózi úırene berý úshin qala, aýyl, kóshe, mekeme  ataýlaryn latyn álipbıimen de jazyp qoıa berý kerek», - dedi  Jumaǵazy Álpishev.