Álınur Hamzın «Slavıan bazary» festıvaliniń laýreaty atandy
NUR-SULTAN. QazAqparat – Qazaqstandyq 12 jasar Álınur Hamzın mýzykalyq «Slavıan bazary» halyqaralyq festıvaliniń laýreaty atanyp, ekinshi dárejeli dıplommen marapattaldy, dep habarlaıdy QazAqparat tilshisi.
Baıqaýdyń alǵashqy kúni jerlesimiz Muqaǵalı Maqataevtyń sózine jazylǵan «Qazaǵym-aı» ánin oryndady. Ádilqazy músheleri Álınurdyń ónerin joǵary baǵalap, 70 upaı berdi.
Jarystyń ekinshi kúni jas ónerpaz Smokı Robınsonnyń Who's Lovin' You ánin shyrqady. Álınurdyń ónerin qazylar 68 upaıǵa baǵalady. Qorytyndylaı kelgende jas ánshi 138 upaı jınady.
Aıta keteıik, «Slavıan bazary» festıvaliniń bıylǵy jeńimpazy belarýstyq Elıseı Kasıch atandy.
Álınur Hamzın 2010 jyly Oral qalasynda dúnıege kelgen. Búginde qaladaǵy № 27 mektep pen №1 mýzykalyq mektebinde bilim alyp jatyr. Sońǵy 5 jyl boıy respýblıkalyq, halyqaralyq baıqaýlar men telejobalarǵa qatysyp keledi. Sonyń ishinde Parıjde ótken Junior Eurovision baıqaýy men Tashkentte ótken «Roza vostoka» atty halyqaralyq saıysy da bar.
Odan bólek, oraldyq ónerpaz «Bala daýysy» telejobasy jáne «Altyn mıkrofon» halyqaralyq vokal baıqaýynyń dıplomanty. Sol sııaqty Boztorgai, Baqytty bala halyqaralyq án baıqaýlarynyń qatysýshysy. Dımash Qubaıbergen atyndaǵy Dears arnaıy syılyǵynyń ıegeri.
Buǵan deıin Vıtebskidegi Slavıan bazary» XXXI halyqaralyq óner festıvaliniń «Vıtebsk-2022» estrada ánshileriniń halyqaralyq baıqaýynda Erik Tólenov (sahnalyq esimi Kyle Ruh), al balalar baıqaýy aıasynda Alınur Hamzın óner kórsetetini týraly habarlaǵan edik.
