Álimjettik jasaǵan oqýshylarǵa qatysty tergeý amaldary bastaldy
TÚRKІSTAN. QazAqparat -Túrkistanda álimjettik jasaǵan mektep oqýshylaryna qatysty tergeý amaldary bastaldy. Bul týraly búgin qalalyq bilim bóliminiń basshysy Aqmaral Batyrbekova aıtty, dep habarlaıdy QazAqparat tilshisi.
«Búgin áleýmettik jelide taraǵan № 31, №18, №11 orta mekteptiń 9-synyp oqýshylarynyń arasyndaǵy álimjettik barlyǵymyz úshin kútpegen jaǵdaı bolyp otyr. Tóbeleske qatysýshylar tolyq anyqtalyp, polıtsııa tarapynan tergeý jumystary bastaldy. Oqıǵa qalamyzdaǵy mekteptiń 9-synyp oqýshylary arasynda sabaqtan tys ýaqytta, ıaǵnı keshki saǵat 17:00 shamasynda bolǵan. Tergeý barysynda ata-analardyń, mektep basshylarynyń jáne ıývenaldy polıtsııa tobynyń jaýapkershilikteri qaralýda», - dedi Aqmaral Batyrbekova.
Oqıǵa oblystyq bilim basqarmasynyń, oblystyq Polıtsııa departamentiniń qatań baqylaýyna alynǵan.
Eske salsaq, áleýmettik jelilerde bir top mektep oqýshylarynyń tómengi synyp oqýshylaryna álimjettik jasap, uryp-soqqany týraly vıdeo tarap ketti. Bul oqıǵaǵa qatysty Іshki ister mınıstrligi jaýap berip, álimjettik jasaǵandardyń anyqtalǵandyǵy týraly habarlaǵan bolatyn.
