Álimjan Qurtaev «Samuryq-Qazynaǵa» enshiles kompanııasynyń paıdasyzdyǵy týraly aıtty
Senator hımııa salasyndaǵy jobalardy basqarý tıimdiliginiń tómen deńgeıin atap ótti. Depýtat óz dálelderin naqty faktilermen bekitti. Mysaly, 2009 jyly «Samuryq-Qazyna» Qory «Birikken hımııalyq kompanııa» JShS qurdy. Onyń qyzmetiniń negizgi maqsaty - kapıtalǵa qatysý arqyly Qazaqstanda jańa hımııa óndiristeriniń damýyna járdemdesý. Bul kompanııanyń jumysy úshin qomaqty qarjy bólindi, onyń basym bóligi - Ulttyq qordan.
Senator atap ótkendeı, osy JShS qyzmetiniń barlyq kezeńinde josparlanǵan 21 jobanyń tek 6 jobasy iske asyryldy, biraq olar da tolyq kólemde jumys istemeıdi.
«Hımııa salasyndaǵy jobalardy basqarý tıimdiligi tómen deńgeıde. Bul salada tıisti memlekettik organdarmen úılestirý sharalary men júıeli jumys joq. Búgin hımııa ónerkásibine tereń, sapaly taldaý jasap, naqty baǵyttardy anyqtaıtyn ýaqyt keldi. Osy saladaǵy barlyq ınvestıtsııalyq jobalar muqııat iriktelýi tıis», - dedi Álimjan Qurtaev.
Depýtat «Birikken hımııalyq kompanııa» JShS-niń odan ári jumys isteýiniń oryndylyǵyn qarastyrýdy jáne osy saladaǵy ýákiletti organdardyń, ǵylymı mekemeler men qaýymdastyqtardyń qatysýymen hımııa salasyn damytý jónindegi vedomstvoaralyq komıssııa qurýdy usyndy.