«Alımentarıýs Kodeksi» komıssııasynyń úılestirýshilik róli talqylandy
Jıyn barysynda Qazaqstannyń «Alımentarıýs kodeksi» komıssııasynyń Eýropalyq óńir boıynsha úılestirýshi retindegi róli talqylandy.
Konferentsııa jumysynyń barysynda qatysýshylar eldiń eksporttyq áleýetin arttyrý, otandyq ónimdi álemdik naryqqa jyljytý jáne halyqaralyq jahandyq ekonomıkaǵa ıntegratsııalaý, sondaı-aq bıznesti barynsha qolaıly júrgizý úshin taǵamdyq standarttardy úılestirýmen qoldaný bóliginde Kodekstiń quraldaryn qoldaný máseleleri boıynsha pikir almasty.
Atap aıtqanda, «Alımentarıýs kodeksi» standarttary tamaq ónimderimen qamtamasyz etý jáne tamaq ónimderiniń adal halyqaralyq saýdasyn damytý qaýipsizdiginiń kepili bolyp tabylady. Tamaq ónimderiniń qaýipsizdigi men sapasynyń buzylýy densaýlyq saqtaý jáne áleýmettik saqtandyrý júıesiniń qosymsha shyǵyndaryna, jappaı ınfektsııalyq jáne ınfektsııalyq emes aýrýlarǵa ári halyq ómiri sapasynyń jalpy tómendeýine alyp kelýi múmkin.
Qazaqstan Jenevada (Shveıtsarııa) Alımentarıýs kodeksi komıssııasynyń 40-shy sessııasynda 2018-2019 jyldarǵa Alımentarıýs kodeksi Komıssııasynyń Eýropa boıynsha FAO/DDSU Úılestirý komıtetiniń jańa óńirlik úılestirýshisi bolyp saılandy. Osy halyqaralyq uıym múshesiniń mártebesi elimizge naryqtyq qatynastar jaǵdaılarynda barynsha joǵary básekelestik turaqtylyqty, sondaı-aq EYDU elderiniń tájirıbesi boıynsha halyq úshin tamaq ónimderiniń qaýipsizdigin jáne sapasyn qamtamasyz etýge múmkindik beredi.
Kodekstiń taǵamdyq standarttary táýekelderdi baǵalaý jónindegi táýelsiz halyqaralyq uıymdardyń jáne FAO men DDSU qurǵan mamandandyrylǵan konsýltatsııalyq ortalyqtardyń kómegimen eń sońǵy ǵylymı zertteýler negizinde ázirlenedi.
Aıta keteıik, Kodeks FAO/DDSU-nyń birlesken úkimetaralyq organy bolyp tabylady. Ol óńirlik qaǵıdat boıynsha 6 úılestirý komıtetten turady (Afrıka, Azııa, Eýropa, Taıaý Shyǵys elderi, Latyn Amerıkasy jáne Karıb óńiri, Soltústik Amerıka elderi). Kodekstiń mıssııasyn iske asyrý úshin jalpy máseleler jáne taýarlar boıynsha 17 komıtet, mıkrobqa qarsy turaqtylyq boıynsha arnaıy úkimetaralyq jumys toby jáne ǵylymı-zertteý bazasy jumys isteıdi. Qazaqstan 2003 jyldan bastap Eýropa boıynsha FAO/DDSU Úılestirý komıtetiniń múshesi bolyp tabylady, onyń quramyna Eýropalyq óńirdiń jáne Ortalyq Azııanyń 52 eli kiredi.
1965 jyly Eýropalyq komıtet qurylǵan sátten bastap 53 jyl ishinde Avstrııa, Polsha, Slovakııa, Shvetsııa, Shveıtsarııa jáne Nıderland Koroldigi sııaqty elder úılestirýshisi bolǵan.