Alıment tóleýdi sotqa jetkizbeı sheshýdiń qandaı joldary bar
ASTANA. QazAqparat – Elimizde alıment tóleýshiler qatary salystyrmaly túrde azaıyp keledi. Sondaı-aq alıment tóleýden jaltaryp júrgenderdiń ózi birneshe sanatqa bólinedi eken. Tolyǵyraq Ádilet mınıstrliginiń málimetinde aıtylǵan, dep habarlaıdy QazAqparat tilshisi.
«Alıment tóleýden jaltaryp júrgender «problemaly alımentter» sanatyna jatqyzylady. Olar izdeýdegi azamattar, alıment boıynsha úsh aıdan astam bereshegi barlar jáne qasaqana tólemeı júrgender. Qazirgi tańda «problemaly alımentter» qatarynda 15 myńnan astam tóleýshi bar. 2021 jyly olardyń sany 16 712 bolǵan, al byltyr jaltarǵandar 15 672 adam. Salystyrmaly túrde kórsetkish azaıyp keledi», - degen jaýap berildi resmı saýalǵa.
Mınıstrlik deregine súıensek, 2021 jyly 232 766 bala jáne kámelet jasyna tolmaǵan jasóspirimge alıment tólendi. Byltyr olardyń sany 257 377 jetti.
Elimizde alıment tóleýshilerdiń 98% - erler, qalǵan 2% - áıelder.
Sol sııaqty alıment tóleýshilerdiń azaıýy nemese kóbeıýi ajyrasý týraly statıstıkamen tikeleı baılanysty.
«Ajyrasýdy boldyrmaý jáne azaıtý maqsatynda aldymen erli-zaıyptyǵa medıatsııa tártibimen tatýlasý joly usynylady. Qandaı jaǵdaı bolmasyn ata-ana kámelet jasyna tolmaǵan balalaryn baǵyp, jetildirýge mindetti. Erli-zaıypty ajyrasqan jaǵdaıda balanyń kimde qalatynyn ózara sheshedi. Sonymen qatar ata-ana alıment tóleý máselesin sottan tys ekijaqty kelisim arqyly sheshe alady. Atap aıtqanda, «Neke jáne otbasy týraly» kodeksiniń 158-babyna sáıkes, alıment tóleýdi notarıýs arqyly kelisimge kelýge jáne medıatordyń kómegine júginý arqyly oń sheshimin tabý múmkindikteri bar», - deıdi mınıstrlikten.
Odan bólek, alıment tóleý mindetin advokat jáne zań konsýltanty qyzmetin paıdalanyp partısıpatıvti rásim arqyly retteýge bolady.
Eske salaıyq, buǵan deıin alıment tólemegen qansha qazaqstandyq shetelge shyǵa almaı júrgenin jazǵan edik.
Sondaı-aq jumyssyz boryshkerden alımentti óndirip alý qalaı júrgiziletinin aıttyq.
Balalaryna alıment tóleýden jaltaratyndar Astanada kóp ekeni de anyqtaldy.
