Alıment tóleýden jaltarǵandarǵa qandaı jaza qarastyrylǵan - prokýratýra jaýaby
ASTANA. KAZINFORM – Qazaqstanda ondaǵan myń bala alımentke táýeldi. Alaıda, barlyq ata-ana óz mindetin oryndaı bermeıdi, dep habarlaıdy Astana ákimdiginiń resmı saıty.
Keıbiri bul jaıynda umytyp ketse, endi biri sot sheshimin ádeıi elemeıdi. Degenmen, zań mundaı quqyqbuzýshylardy jazasyz qaldyrmaıdy. Alıment tóleýden jaltarǵandarǵa qandaı jaza qoldanylatyny týraly elordadaǵy Nura aýdanynyń prokýratýrasy túsindirip berdi.
«Neke (erli-zaıypty) jáne otbasy týraly» kodekstiń 171-babyna sáıkes, alımentti keshiktirgen ár kúni úshin qaryz somasynyń 0,1%-y mólsherinde ósimpul esepteledi.
Osymen bári bitken joq. Tólemnen jaltarǵandarǵa Ákimshilik quqyqbuzýshylyq týraly kodekstiń 669-babyna sáıkes ákimshilik jaza qoldanylady:
• 5 AEK-ke deıin aıyppul;
• 5 táýlikke deıin ákimshilik qamaqqa alý.
Eger boryshker birneshe aı boıy alıment tólemeı, sot oryndaýshylarynyń eskertýine qulaq aspasa, ol qylmystyq jaýapkershilikke tartylýy múmkin. QR Qylmystyq kodeksiniń 139-babynda mynadaı jaza túrleri kózdelgen:
• 600 saǵatqa deıin qoǵamdyq jumys;
• 2 jylǵa deıin bas bostandyǵynan aıyrý.
Mysaly, Nura aýdanynyń prokýratýrasy alıment qaryzy bar bola tura, kazıno men býkmekerlik keńselerden utys alǵan, alaıda úsh aıdan astam ýaqyt boıy ádeıi tólem jasaýdan jaltarǵan boryshkerlerdi anyqtady.
Atqarylǵan jumys nátıjesinde 11 boryshker qylmystyq jaýapkershilikke tartyldy.
Basqasha aıtqanda, bala aldyndaǵy borysh qamaýǵa alýmen aıaqtalýy múmkin. Biraq tipti sotqa jetkizbeı-aq qoldanylatyn shekteý sharalary bar.
Sot oryndaýshylary mynalardy jasaýǵa quqyly:
• shetelge shyǵýǵa tyıym salý;
• ýaqytsha júrgizýshi kýáliginen aıyrý;
• múlik pen shottarǵa tyıym salý.
Bul – múmkin bolatyn shekteýlerdiń bir bóligi ǵana.
Eger qarjylyq qıyndyqtar týyndasa – jasyrynyp qalýdyń qajeti joq. Boryshkerge eńbekpen qamtý organdaryna júginý nemese tólemdi bólip tóleý týraly kelisim jasaǵany jón.
Nura aýdanynyń prokýratýrasy kámeletke tolmaǵan balalardy asyraý mindeti ata-analarǵa júkteletinin eske salady.
Aıta keteıik, BQO-da alıment bereshegi 375 myń teńgeden asqan er adam qamaýǵa alyndy.