Alıment tóleýden qashyp júrgen taksı júrgizýshileri jańa tásilmen anyqtalady

ALMATY. KAZINFORM – Almaty qalasynyń prokýratýrasy alıment tólemeı júrgen taksı júrgizýshilerin jańa tásilmen anyqtamaq. 

Almaty qalalyq prokýratýrasy men Yandex Qazaqstan alıment tólemegenderdi birlesip anyqtaıtyn kelisim jasasty.

— 2025 jyly 110 osyndaı fakti anyqtaldy, 57 adamǵa ákimshilik yqpal etý sharalary qoldanyldy, 10 fakti boıynsha sotqa deıingi tergep-tekserý bastaldy, — delingen Almaty qalasy prokýratýrasy habarlamasynda.

Qala prokýrory qabyldanǵan sharalarǵa qaramastan, formaldi túrde jumyssyz, biraq is júzinde sandyq platformalar, onyń ishinde taksı arqyly tabys tabatyn qasaqana alıment tólemeıtinderdiń naqty tabysyn jasyrý faktileriniń anyqtalǵanyn atap ótti.

Kelisim, júıeli jáne zańdy aqparattyq ózara is-qımyldy, jedel málimet almasýdy, sondaı-aq kiristerdi jasyrý jáne alımenttik bereshektiń paıda bolý faktilerin anyqtaýǵa jáne jolyn kesýge járdemdesýdi kózdeıdi.

Atalǵan memorandým balalar quqyqtaryn qorǵaýǵa jáne memleket pen áleýmettik jaýapty bıznestiń ózara is-qımyly negizinde alımenttik mindettemelerdi oryndaýdyń bultartpastyǵyn qamtamasyz etýge baǵyttalǵan.

Aıta ketelik ShQO-da balasyna alıment tólemegen er adam túrmege qamaldy.