Alıment tóleýden qasaqana jaltaratyndar arasynda tabysty kásipkerler de bar - Astana q. prokýratýrasy
ASTANA. QazAqparat - Astana qalasy boıynsha Ádilet departamentiniń statıstıkalyq málimetterine sáıkes, búginde alımentterdi tóletý boıynsha 17 myńnan astam oryndaý qujattar oryndalýy tıis.
Onyń ishinde 5 myńnan astam boryshyn qasaqana tólemeıtinderdiń qaryzy 302 mln. teńgege jetti.
«Qazaqstanda alımentterdi tólemeıtin adamdardyń sany ósý ústinde. Jalpy alǵanda, Qazaqstan boıynsha júz myńnan astam bala óz mindetterin óteýge qulyqsyz ákeleri men analarynan ózderine tıesili aqshany ala almaýda. Bul sanatqa tabysty kásipkerler de kiredi», dep habarlady Astana qalasynyń prokýratýrasynan.
Zańǵa sáıkes, ata-analary kámelettik jasqa jetpegen balalaryn nekede turǵandaryna nemese ajyrasqandaryna qaramastan asyraýlary tıis.
«Alımentterdi tólemeý sebepteri retinde jumyssyzdyqty nemese aqshanyń joqtyǵyn emes, alıment tóleýshilerdiń olardy tóleý nıetiniń joqtyǵyn ataýǵa bolady. Salyq tóleýden jaltarý úshin jalaqyny «jabyqhatqa salyp» tóleıtin jumys berýshilerdiń kóp bóligi sol arqyly alıment tóleýshilerden alynatyn alımentter kóleminiń eń az bolýyna tikeleı áserin tıgizedi», delingen habarlamada.
Zertteý kórsetkendeı, óz balalaryn tıisti túrde tárbıeleı almaıtyn ata-analardyń kesirinen minez-qulqy qoǵamǵa qaıshy keletin urpaqtar legi tárbıelenedi.
Qazaqstan Respýblıkasynyń Ákimshilik quqyq buzýshylyqtar týraly Kodeksiniń 669-babyna sáıkes alımentterdi tóleýden jaltarǵandar úshin ákimshilik jaýapkershilik qarastyrylǵan. Kináli tulǵalarǵa sot aktisin oryndamaǵany úshin Qazaqstan Respýblıkasy Qylmystyq Kodeksiniń 430- babymen qarastyrylǵan qylmystyq jaýapkershilik qoldanylady.
