Alıment tólemeıtinderdi júrgizýshi quqyǵynan aıyrý kerek - S.Aqylbaı
ASTANA. QazAqparat - Búgin Parlament Cenatynyń jalpy otyrysynda senator Serik Aqylbaı alıment óndirý máselesin kótere otyryp, alıment tólemeıtinderdi 1 jylǵa deıin júrgizýshi quqyǵynan aıyrýdy usyndy.
Senatordyń aıtýynsha, qazirgi tańda alıment óndirip alý ózekti máseleniń birine aınalǵan. Máselen, sot atqarýshylarynda alıment óndirý boıynsha 213 myń sheshim bolsa, sonyń ishinde 14 myńnan astamy ótelmeı keledi. Osyǵan oraı, depýtat S.Aqylbaı keıbir boryshkerlerdiń óz mindettemelerin atqarýǵa tolyq múmkindigi bar ekendigin de eskertti.
«Qazirgi tańda qoldanystaǵy mehanızmder alıment óndirý máselesin tolyqqandy sheshe almaıdy. Osyǵan oraı, sot belgilegen mindettemeni atqarmaıtyn boryshkerdiń kólik júrgizý quqyǵyn ýaqytsha shekteý máselesi týyndap otyr. Shekteý boryshker óz mindetin atqarmaıynsha bekitilýi tıis, biraq bir jyldan aspaýy kerek. Bul rette múgedektigi nemese tabys tabýdyń jalǵyz kózi bolǵan jaǵdaıda olardyń kólik júrgizýine tyıym salynbaýy kerek. Sonymen qatar alıment qaryzy 3 aılyq jalaqydan aspaıtyn bolsa, mundaı shekteýdi qoldanbaýǵa bolady», - deıdi Serik Aqylbaı.
Onyń sózine qaraǵanda, alıment óndirýdiń bul tásili halyqaralyq tájirıbede bar. Máselen, Belarýs elinde boryshkerlermen kúrestiń osy túri qoldanylady.
