Alıment tólemeıtinder qaı óńirde kóp – mınıstrlik jaýaby
«Neke jáne otbasy» kodeksi qaǵıdattarynyń biri, balalardyń quqyǵy men múddesin qorǵaý. Kodekstiń 138-babyna sáıkes, ata-ana kámeletke tolmaǵan balalaryn kútip-baǵýǵa mindetti. Ata-analar ajyrasqan jaǵdaıda kámeletke tolmaǵan balalaryna tárbıe-bilim berý, asyraý jáne alıment tóleý boıynsha ózara kelisim jasasýǵa quqyly. Atalǵan kodekstiń 139-babyna sáıkes sot kámelet jasyna tolmaǵan balalardyń alımentin ata-anasynyń aı saıynǵy tabysynan bir bala bolsa, tórtten bir bóligi, eki balaǵa úshten bir bóligi, úsh jáne odan da kóp balaǵa jalaqynyń jartysy mólsherinde óndirip alady», - delingen agenttiktiń resmı saýalyna Ádilet mınıstrligi bergen jaýapta.
Sondaı-aq mınıstrlik qaı óńirlerde alımentti ýaqytyly tólemeıtinder kóp ekenin málim etti.
«Problemaly alımentterdiń eń kóp sany – Astana qalasynda. Atap aıtqanda, tólenbegen alıment týraly 2 803 qujat bar. Odan ári Almaty qalasy – 1 699, Jambyl oblysy – 1 402, Qaraǵandy oblysy – 1 213 jáne Túrkistan oblysy 1 132 qujat», - delingen vedomstvo aqparatynda.
Eske salaıyq, buǵan deıin alıment tólemegen qansha qazaqstandyq shetelge shyǵa almaı júrgenin jazǵan edik.
Sondaı-aq jumyssyz boryshkerden alımentti óndirip alý qalaı júrgiziletinin aıttyq.