Alıment tólemeıtin ákeler 7 jylǵa sottalady

ASTANA. QazAqparat - Balasyna bereshegi 10 myń AEK-ten asyp ketken alıment tóleýshiler 7 jylǵa bas bostandyǵynan aıyrylady.

Bul týraly búgin «Qazaqstan Respýblıkasynyń keıbir zańnamalyq aktilerine atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń 2014 jylǵy 15 qańtaryndaǵy Zańyn túsindirýge arnalǵan brıfıngte QR Ádilet mınıstrligi Sot aktilerin oryndaý komıtetiniń bas sarapshysy Mádına Muqasheva aıtty.

Zańnyń negizgi maqsaty atqarýshylyq is júrgizý salasyn retteıtin zańnamany jetildirý, sot oryndaýshylarynyń jumys tıimdiligin joǵarylatýda olardyń ókilettigin keńeıtý, sybaılas jemqorlyq kórinisterine yqpal jasaıtyn normalardy alyp tastaý, zańdy kúshine engen sot aktileriniń meılinshe kóp oryndalýyna qol jetkizý bolyp tabylady.

«Zańda teris áleýmettik-ekonomıkalyq jáne quqyqtyq saldar joq», - dep atap ótti bas sarapshy.

Qujatqa engizilgen negizgi ózgerister myna baptarda kórinis tapqan:

-sot aktilerin oryndamaǵany úshin bas bostandyǵynan aıyrýdy belgileý arqyly jaýapkershilikti kúsheıtý, QR QK 136-baby (alıment tóleý boıynsha mindetterin oryndamaý) boıynsha jáne QR QK 362-babynyń 1-bólimi (sot úkimin, sheshimin jáne atqarýshylyq qujatty oryndamaý) boıynsha 2 jyldan 3 jylǵa deıin merzimge, sáıkesinshe QR QK 362-babynyń 3-bólimi «bereshek somasy 10000 AEK joǵary bolsa) boıynsha 7 jylǵa bas bostandyǵynan aıyrý engizildi, atalǵan sharalardy belsendi qoldaný olardyń aldyn alýdy qamtamasyz etýge múmkindik beredi;

-boryshkerdi jaýapkershilikke tartýda negizgi kedergi bolatyn «qasaqana» uǵymyn túsiniksiz jazylýyna baılanysty alyp tastaý;

-ákimshilik aıyppuldardyń tómengi shegin belgileý jáne joǵary shegin kóbeıtý;

-atqarýshylyq is júrgizý organdaryna ákimshilik quqyq buzýshylyqtar týraly isterdi qaraý ókilettigi beriledi;

-atqarýshylyq is júrgizýdiń uzaqqa sozylýyna ákeletin jáne sybaılas jemqorlyqqa jaǵdaı jasaıtyn óz erkimen oryndaý ınstıtýtyn alyp tastaý;

-ýaqtyly oryndamaǵany úshin ósimaqy engizý.

«Jalpy, Zań boryshkerlerde óz mindetterine degen tıisti qarym-qatynasty qalyptastyrýǵa múmkindik beredi jáne sot sheshimderiniń ýaqtyly ári múltiksiz oryndalýyna yqpal jasaıtyn bolady», - dep atap ótti M. Muqasheva.