Alıment tólemeı júrgen er adam 3 jylǵa qamalýy múmkin
PETROPAVL. QazAqparat – Soltústik Qazaqstan oblysynda úsh jyl boıy alıment tóleýden jaltaryp, qaryzy 1,6 mln teńgege jetken er adam arnaıy reıd barysynda tabyldy, dep habarlaıdy QazAqparat tilshisi.
Petropavldyń 43 jastaǵy turǵyny eki balasyna 1,6 mln teńge qaryz. Qomaqty soma úsh jyldyń ishinde jınalǵan. Sot boryshkerdiń bank esepshottaryna tyıym salyp, elden shyǵýyna shekteý qoıǵanymen, er adam qaryzynan qutylýǵa asyqpaǵan. Sot oryndaýshylaryna oǵan izdeý jarııalaýǵa týra kelipti. Boryshker áke reıdtik is-shara barysynda qala kósheleriniń birinde toqtatyldy.
«Meniń turaqty tabysym joq. Jumysqa endi ǵana ornalasyp jatyrmyn. Meni izdegenderińizdi búgin ǵana bilip jatyrmyn. Qaıda turatynymdy bári biledi, eshkimnen jasyrynǵan joqpyn. Al qaryzymdy balalaryma qaıtaramyn», - deıdi boryshker áke.
Sot oryndaýshylarynyń aıtýynsha, qazir ol ákimshilik jaýapkershilikke tartylyp, aıyppul tóleıdi.
«Oǵan aıyppul tóletip, eskertý jasaımyz. Budan nátıje shyqpasa, qylmystyq jaýapkershilikke tartylady. ıAǵnı biz quqyq qorǵaý organdaryna hat joldaımyz. Ári qaraı qylmystyq jaza qarastyrylýy múmkin. Bas bostandyǵynan 3 jylǵa deıin aıyrý nemese qoǵamdyq jumystarǵa tartý jazasy qoldanylady», - deıdi SQO boıynsha jeke sot oryndaýshylardyń óńirlik palatasynyń jetekshisi Asan Mátkárimov.
Mamandardyń aıtýynsha, SQO-da alımentke qatysty óndiriste 6 myńǵa jýyq is bolsa, sonyń 270-i problemalyq. 147 adam bir ret te tıisti alımentti tólemegen.