Alıment tólemeı júrgen elorda turǵyny balasyna páter alyp berdi
NUR-SULTAN. QazAqparat - Elordada 2017 jyldan beri alıment tólemeı kelgen azamat ulyna 1 bólmeli páter satyp áperdi, dep habarlaıdy QazAqparat tilshisi.
«2017 jyldyń qarashasynda 2016 jylǵy sot buıryǵy negizinde azamat A-dan burynǵy áıeline uldaryn baǵyp-qaǵýy úshin alıment óndirip alý týraly atqarýshylyq óndiris qozǵalǵan bolatyn. Sot buıryǵy túsken sátten qaýly negizinde 769 620 teńge qaryzdy óndirip alýdyń barlyq májbúrli sharalary qabyldandy», - dedi Nur-Sultan qalalyq jeke sot oryndaýshylary óńirlik palatasy basshysynyń orynbasary Madına Janasaeva.
Onyń aıtýynsha, 2020 jyldyń jeltoqsanynda boryshker men óndirip alýshy alımentti tóleý týraly kelisimge kelip, onyń aıasynda boryshker alıment boıynsha negizgi jáne aldaǵy ýaqyttaǵy qaryzdarynyń esebinen ulyna páter satyp áperdi. Páter Aqmola oblysyna qarasty Qosshy eldi mekeninde ornalasqan. Osyǵan oraı atqarýshylyq óndiris toqtatyldy.
