Alıment tólemes úshin aqshasyn ámııanǵa saqtap qoıǵan 170 boryshker balasynyń nesibesin berýge májbúr boldy

ASTANA. KAZINFORM — 1 shildedegi jaǵdaı boıynsha 253 myń qaskóı ata-ananyń 367 myń bala aldyndaǵy boryshy 19 mlrd teńgege jetken. Bas prokýratýra alıment tólemeı júrgen ata-anamen kúresti jalǵastyryp jatyr. 

oryshkerler bereshekti tólemeýdi jumystyń joqtyǵymen aqtaıdy. Shynynda da, olardyń kópshiligi resmı túrde jumyssyz jáne jumysqa ornalasý úshin shara qoldanbaıdy.

Іs júzinde qazirgi zamanǵy tabys kózderi, taksı jáne jetkizý qyzmetteri (ıAndeks, Wolt, Glovo, Indriver) boryshkerlerge eńbek shartyn jasamastan kiris alýǵa múmkindik beredi.

Áleýmettik jeliler de (Facebook, Instagram, Twitter, TikTok jáne YouTube) jaqsy tabys ákelýi múmkin. Mysaly, oqyrmany kóp akkaýnt ıeleri jarnamadan aqsha tabady.

Qaskóı boryshkerler balalardy asyrap baǵý mindettemesin oryndaýdan jaltarý maqsatynda osyndaı tabysyn jasyryp, aqshany elektrondy ámııandarda saqtaıdy.

Qazir qyzmetterdiń barlyq salalary elektrondy tólem ádisterine kóshti.

2023 jyly Qazaqstandaǵy qolma-qol aqshasyz operatsııalardyń úlesi — 86,2%, tranzaqtsııa kólemi 142,6 trln teńgeni quraǵan. 

Kirister (resmı jáne resmı emes) kart-shottarǵa túsedi.

Balalardyń múddesin qorǵaý maqsatynda prokýratýra organdary óz ókilettigi sheginde osyndaı jasyryn tabysty anyqtaý jáne boryshkerlerdi zańda belgilengen jaýapkershilikke tartý jóninde shara qabyldap jatyr. 

Astana prokýratýrasy elektrondy ámııandarda 350 mln teńgeden astam somaǵa aqshasyn jasyrǵan 170 qaskóı boryshkerdi anyqtady. 

Alıment tóleýden jaltarý faktileri boıynsha (QQ-niń 139-baby boıynsha) 30 sotqa deıingi tergeý bastalyp, osydan keıin 45 mln teńgege bereshek óteldi.

Qylmystyq isterdiń nátıjesinden 7 boryshkerge bas bostandyǵyn shekteý jáne qoǵamdyq jumysqa tartý jazasy taǵaıyndaldy.

2 is tatýlasýyna baılanysty toqtatyldy, taǵy 20 isti polıtsııa tergep jatyr, bir is sottyń qaraýynda.

Jalpy, jyl basynan beri prokýrorlyq qadaǵalaý sharalarymen 15,5 myń balanyń quqyǵy qorǵaldy, sot oryndaýshylary olardyń paıdasyna 2,3 mlrd teńgeden astam qaryzdy óndirdi.

Alıment tóleýden jaltarǵan 1,7 myń boryshker qylmystyq jáne ákimshilik jaýapqa tartyldy.

Bul baǵyttaǵy jumys turaqty baqylaýda.