Alıment tólemegenderge jazany qatańdatý bereshekti óteýge kepil bola ma
ASTANA. KAZINFORM – Elimizde alıment tólemegeni úshin qylmystyq jaýapkershilikke tartylǵandar úlesi artyp keledi. Biraq jazany qatańdatý bereshektiń ótelýine árdaıym kepildik bermeıdi. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Kámeletke tolmaǵan balalardyń quqyqtaryn qorǵaý maqsatynda olardy asyraýǵa qarajat tóleý jónindegi mindetterdi oryndamaǵany úshin eki jylǵa deıingi merzimge bas bostandyǵynan aıyrý jazasy (Qylmystyq kodekstiń 139-baby) qos alǵanda qylmystyq jaýapkershilik kózdelgen. Osy sanattaǵy sotqa joldanǵan qylmystyq isterdiń úlesi 2020 jylǵy 11%-dan 2025 jyly 37,1%-ǵa deıin ósti, - dedi Úkimet basshysy.
Oljas Bektenov qylmystyq quqyq buzýshylyq belgileri bolmaǵan jaǵdaıda sot úkimin, sheshimin nemese ózge de sot aktisin, sondaı-aq atqarýshylyq qujatty oryndamaǵany úshin ákimshilik jaýapkershilik kózdelgenin atap ótedi.
- Qylmystyq jáne ákimshilik jaýapkershilikti odan ári qatańdatý bereshektiń naqty ótelýine ózdiginen kepildik bermeıdi. Atap aıtqanda, bas bostandyǵynan aıyrýǵa baılanysty jaza boryshkerdiń tabys tabý jáne alıment tóleý mindettemelerin oryndaý múmkindigin shekteýi yqtımal. Osyǵan baılanysty quqyq buzýshylyqtardyń sıpatyn, jaýapkershiliktiń mólsherlestik qaǵıdatyn jáne alımenttik mindettemelerdiń oryndalýyn qamtamasyz etý qajettiligin eskere otyryp, qylmystyq jáne ákimshilik sanktsııalardy ózgertý máseleleri zań shyǵarý qyzmeti aıasynda qosymsha zerdelenetin bolady, - dedi Premer-mınıstr.
Úkimet basshysynyń saýalyna qosymsha usynylǵan anyqtamaǵa sáıkes, 2026 jyldyń 9 aıynda Qylmystyq kodekstiń 139-baby boıynsha 991 qylmystyq is óndiriste bolǵan. Onyń ishinde 356 is sotqa joldanǵan. Bul aıaqtalǵan isterdiń 43,2%-yn quraıdy. Taǵy 185 is aqtalmaıtyn negizder boıynsha toqtatylǵan. Sondaı-aq osy ýaqyt ishinde Ákimshilik quqyq buzýshylyq týraly kodekstiń 669-baby boıynsha 3 477 boryshker ákimshilik jaýapkershilikke tartylǵan.
Aıta keteıik, jumyssyz adam da alıment tóleýge mindetti.
