Alıment tólemegen qansha qazaqstandyq shetelge shyǵa almaı júr

ASTANA. QazAqparat – Elimizde alıment tóleýden jaltaryp júrgenderge qandaı sharalar qarastyrylǵan? Ótken jyly qansha adam jazaǵa tartyldy? Atalǵan máselege qatysty QazAqparat tilshisi Ádilet mınıstrligine saýal joldaǵan edi.

«Aldymen, boryshkerdiń jeke shottary men múlki buǵattalady. Shetelge shyǵýyna shekteý qoıylady. Odan bólek, sot arqyly kólik quralyn basqarý quqyǵynan aıyrylady. Sonymen qatar alıment tóleýden qasaqana jaltaryp júrgenderge, Ákimshilik quqyq buzýshylyq kodeksiniń 669-babyna jáne Qylmystyq kodekstiń 139-babyna sáıkes ákimshilik jáne qylmystyq jaýapkershilikter qarastyrylǵan», - delingen Ádilet mınıstrliginiń resmı jaýabynda.

Mınıstrliktiń aqparatynsha, alıment tólemeı júrgenderdiń máselesi zań aıasynda jeke qaralady.

«Qylmystyq kodekstiń 139-babyna sáıkes ótken jyly 126 boryshker qylmystyq jaýapqa tartyldy. Sonymen qatar 16 671 boryshkerge sot oryndaýshysynyń sot sanktsııalaǵan qaýlysy negizinde «Atqarýshylyq is júrgizý jáne sot oryndaýshylarynyń mártebesi týraly» Zańynyń 33-babyna sáıkes Qazaqstan aýmaǵynan shyǵýyna shekteý salyndy. Sondaı-aq ákimshilik quqyq buzýshylyq týraly kodekstiń 669-babyna sáıkes 4 065 boryshker ákimshilik jaýapkershilikke tartyldy», - deıdi vedomstvodan.