Alıment tólemegen 421 boryshkerdiń kóligi arnaıy turaqqa qoıyldy
ASTANA. KAZINFORM – Qazaqstanda alıment óndirý isi boıynsha 292 myń atqarý óndirisi oryndalýda. Onyń ishinde 12 myńnan astam problemaly boryshker bar. Bul týraly QR Ádilet mınıstrliginiń resmı ókili Talǵat Ýálı aıtyp berdi.
Onyń aıtýynsha, problemalyq boryshkerler somasy 14,6 mlrd teńge jetedi. Qazirgi tańda 7 882 alıment boıynsha boryshkerge Qazaqstan aýmaǵynan shyǵýǵa ýaqytsha shekteý qoıyldy.
«Barlyq alıment tóleminiń jalpy sanynyń 97,1%-yn er adamdar tóleýde, al áıelder 2,9%-yn quraıdy. 2023 jylǵy kórsetkishtermen salystyrǵanda alıment tóleý boıynsha oń dınamıka baıqalady. Keıingi málimetter boıynsha, problemalyq óndirister sany 25 paıyzǵa, al boryshkerlerdiń jalpy bereshegi 31 paıyzǵa azaıǵan», - dedi T. Ýálı mınıstrlik uıymdastyrǵan brıfıngide.
Reıdtik is-sharalar aıasynda polıtsııamen birlesken belsendi jumys júrgizilip jatyr.
«Máselen, bıylǵy jyldyń basynan beri respýblıka boıynsha 144 reıd júrgizilip, 421 kólik arnaıy turaqqa qoıyldy. Sol arqyly boryshkerlerden 300 mıllıon teńgege jýyq qarajat óndirildi», - dedi resmı ókil.
Eske salsaq, máıithanada nekrofılııa jasady degen kúdikti ádilet organdarynda jumys istemeıtini habarlanǵan bolatyn.
