Alıment tólemegen 1 125 elordalyqqa el aýmaǵynan shyǵýǵa shekteý qoıyldy
ASTANA. QazAqparat - Astana qalasy Almaty aýdanynyń prokýrory Alan Tilenshıevtiń tóraǵalyǵymen «Alıment. Tólemeýge qarsy 30 qadam» atty joba aıasynda ýákiletti organdardyń qatysýmen jınalys ótti, dep habarlaıdy QazAqparat.
«Aýdandyq prokýratýrada atalǵan sanattaǵy qylmystyq isterdiń tergep-tekserýi talqylanyp, qoldanylyp jatqan sharalardyń tolyqtyǵyn qamtamasyz etý men alıment tólemderin óndirý maqsatynda ádistemelik nusqaý daıyndaldy. Búgingi ýaqytta, ýákiletti organdar 250-den astam boryshkerdiń mekenjaıyna reıdtik jumystar júrgizip, 98 kináli tulǵa ákimshilik jaýapkershilikke tartylsa, sot oryndaýshylardyń boryshkerlerdi qylmystyq jaýapqa tartý jóninde joldaǵan 220 usynysy Almaty aýdandyq ishki ister basqarmasynyń sotqa deıingi tergep-tekserýlerdiń biryńǵaı tizilimine tirkeldi», - delingen aýdandyq prokýratýra taratqan aqparatta.
Prokýratýra málimetinshe 1 125 boryshkerge Qazaqstan Respýblıkasy aýmaǵynan shyǵýǵa ýaqytsha shekteý qoıyldy, sonymen qatar aqshalaı qarajattary buǵattaldy. Bul rette, atalǵan joba aıasynda 715 atqarýshylyq óndirispen 130 mln. teńgeden astam qarajat kámeletke tolmaǵandarǵa óndirildi. Ádilet, ishki ister organdary jáne prokýratýramen birlesken bul baǵyttaǵy jumystar odan ári júrgiziledi jáne aýdandyq prokýratýranyń qadaǵalaýynda.
