Alıment máselesi: tabysyn qasaqana jasyrǵandardy anyqtaýdyń jańa tetigi engizilmek
ASTANA. KAZINFORM — Boryshkerlerdiń ózge de kiris kózderin anyqtaýǵa agregator-saıttar kómektesedi. Bul týraly Ádilet mınıstri Erlan Sársembaev málim etti.
— Boryshkerdi jumysqa ornalastyrý rásimin avtomattandyrýǵa baǵyttalǵan jumystar iske asyp jatyr. Olardyń áleýmettik mártebesi týraly qajet málimetterdi alý úshin aqparattyq júıe Eńbek mınıstrliginiń aqparattyq júıesimen ıntegratsııalanady. Sonymen qatar, agregator-saıttar (ıandeks, ındraıver jáne t. b.) arqyly jumys isteıtin boryshkerdiń jasyryn tabysyn anyqtaıtyn bolamyz, — dedi E. Sársembaev Parlament Májilisinde jeke sot oryndaýshylary ınstıtýtynyń problemalary taqyrybyna arnalǵan Úkimet saǵatynda.
Onyń aıtýynsha, qazirgi ýaqytta boryshkerlerdiń ózge de kiris kózderin anyqtaý jáne olardan qaryzdy óndirip alý múmkindikterine taldaý jasalyp jatyr (elektrondyq ámııandar arqyly, býkmekerlik kompanııalardan, baǵaly qaǵazdarmen saýda bırjasynan, krıptovalıýta operatsııalarynan, jelilik marketıngten, taksı qyzmetterinen jáne t. b. alynǵan kiris kózderi).
— Konstıtýtsııalyq sottyń (2024 jylǵy 28 maýsymdaǵy № 372) Normatıvtik qaýlysymen dara kásipkerlik qyzmetpen aınalysatyn adamdardan kámeletke tolmaǵan balalaryn kútip-baǵýǵa alımentterdi esepteý jáne óndirip alý týraly zańnamasyn jetildirý máselesin qaraý usynyldy. Osy qaýlyny oryndaý aıasynda «Neke jáne otbasy týraly» Kodekske sot dara kásipkerlerge alıment mólsherin turaqty aqsha somasynda aıqyndaýdy kózdeıtin túzetýler ázirlendi. Atalǵan zańnamalyq túzetýler ákimshilik ádilet salasyn jetildirý jáne keńeıtý máseleleri jónindegi zań jobasy sheńberinde depýtattardyń qaraýynda jatyr. Sonymen qatar, qazirgi ýaqytta alıment óndirip alýdy jetildirý máseleleri Parlament Senatynda qaralyp jatqanyn atap ótkim keledi. Senatta tıisti memlekettik organdardyń jáne jeke sot oryndaýshylarynyń respýblıkalyq palatasynyń, sondaı-aq qoǵam ókilderiniń qatysýymen jumys toby quryldy, — dedi vedomstvo basshysy.
Budan buryn habarlanǵandaı, alıment óndirip alý týraly atqarýshylyq qujattardy oryndaý kezindegi negizgi problemalar turaqty tabystyń nemese múliktiń bolmaýyna, al keıbir jaǵdaıda tabystardy qasaqana jasyrýǵa qatysty oryn alyp jatady.
Jyl basynda oryndaýda 283 myń qujat boldy, onyń 12 835-i nemese 4% paıyzy problemaly sanatqa jatqyzylǵan jáne olar boıynsha alıment tólenbeı jatyr.