Alıment keshiriletin qaryz túrine jatpaıdy – mınıstrlik

ASTANA. QazAqparat – Adam densaýlyǵyna zııan keltirý jáne alıment boıynsha bereshek keshiriletin qaryzdarǵa jatpaıdy. Bul týraly QR Qarjy vıtse-mınıstri Erjan Birjanov málim etti, dep habarlaıdy QazAqparat tilshisi.

«Azamattardyń tólem qabilettiligi jáne bankrottyǵy týraly zań jobasyn ázirleý barysynda atalǵan ınstıtýt qalyptasqan elderdiń tájirıbesi saralandy. Mysaly, Germanııa jáne AQSh-ta bankrot bolǵan tulǵaǵa 10 jyl nesıe alýǵa tyıym salynady. Al Reseıde 5 jylǵa deıin jeke kásipkerlikpen aınalyspaıdy, basshylyq laýazymǵa taǵaıyndala almaıdy. Halyqaralyq tájirıbeni eskere otyryp, rásimderdiń 3 túrin engizýdi usynyp otyrmyz», - dedi Erjan Birjanov Senat qabyrǵasynda ótken dóńgelek ústel barysynda.

Osy tusta eske salsaq, taıaýda ǵana QR Premer-Mınıstriniń orynbasary-Qarjy mınıstri Erulan Jamaýbaev bankrottyq rásimder týraly baıandaǵan edi.

«4,9 mıllıon teńgeden asatyn qaryz jáne basqa da bereshek túrleri boıynsha azamattar sot bankrottyǵyna júgine alady. Bul rásim barysynda boryshkerdiń múlki aýktsıonda satýǵa qoıylady. Túsken qarajat sol azamattyń kredıtorlar aldyndaǵy qaryzyn óteýge jumsalady. Boryshkerdiń qalǵan ótelmegen somasy keshiriledi. Alaıda, basqa adamnyń ómiri men densaýlyǵyna keltirilgen zııan men alıment boıynsha qaryz esepten shyǵarýǵa jatpaıdy», - deıdi ol.