Alıment qaryzy bar 279 pavlodarlyq qumar oıynǵa 600 mln teńge tikken
PAVLODAR. KAZINFORM – Pavlodar oblysynyń prokýratýrasy alıment boıynsha bereshegi bar azamattardyń býkmekerlik keńselerde qumar oıyndarǵa qatysý faktilerin anyqtady.
Prokýratýra málimetinshe, OLIMPBET býkmekerlik keńsesiniń qyzmetin tekserý barysynda Qazaqstan Respýblıkasynyń «Oıyn bıznesi týraly» zańynyń talaptary buzylǵany belgili boldy.
Atap aıtqanda, alıment boıynsha bereshegi bar 279 adam esh kedergisiz oıyn shottaryn tolyqtyryp, bás tikken. Olardyń oıyn shottaryna salǵan qarajatynyń jalpy kólemi 600 mln teńgeden asqan. Al shottardan shyǵarylǵan qarajat 415 mln teńgeden astam somany qurady.
– Anyqtalǵan tulǵalardyń 97-si alıment tóleýden qasaqana jaltarǵan. Zań buzýshylyqtar boıynsha oblys prokýratýrasy Oıyn bıznesin jáne lotereıany retteý komıtetine prokýrorlyq qadaǵalaý aktisin engizdi, – dep habarlady Pavlodar oblysynyń prokýratýrasy.
Qadaǵalaý aktisin qaraý nátıjesinde ýákiletti organ býkmekerlik keńselerdi Biryńǵaı esepke alý júıesine qosý boıynsha sharalar qabyldady.
Bul júıe qabyldanǵan barlyq báster men tólengen utystardy avtomatty túrde esepke alady. Sonymen birge atqarýshylyq qujattar boıynsha oryndalmaǵan mindettemeleri bar boryshkerlerdiń tizilimi arqyly klıentterdi tekserip, olarǵa qumar oıyndarǵa qatysýǵa shekteý qoıýǵa múmkindik beredi.
Qazirgi ýaqytta Biryńǵaı esepke alý júıesimen ıntegratsııa jeti býkmekerlik keńsede, sonyń ishinde OLIMPBET kompanııasynda tolyq aıaqtalǵan. Taǵy on býkmekerlik keńse tıisti kelisimderge qol qoıǵan.
Prokýratýra qabyldanǵan sharalar qumar oıyndar salasyndaǵy memlekettik baqylaýdy kúsheıtip, zań boıynsha bás tigýge tyıym salynǵan tulǵalardyń oıyndarǵa qatysýyna jol bermeýge jáne alıment óndirý týraly sot sheshimderiniń oryndalý tıimdiligin arttyrýǵa múmkindik beretinin atap ótti.
Aıta keteıik, Qostanaı oblysynda alıment qaryzy bar eki boryshker baspanasyn berdi.
