Alıment bereshegi 5 mln teńgeden asqan baıqońyrlyq qamaýǵa alyndy
QYZYLORDA. KAZINFORM — Baıqońyr qalalyq sotynda Ákimshilik quqyq buzýshylyq týraly kodekstiń 669-babynyń 1-bóligi boıynsha is qaraldy.
Sot usynǵan is qujattaryna qaraǵanda quqyq buzýshy sot buıryǵynyń negizinde kámeletke tolmaǵan balalaryn asyraý úshin alıment tóleýge mindetti bolǵan. Alaıda, atqarý qujatynyń talaptaryn bile tura oryndamaı, tólem jasaýdan jaltarǵan.
— Alıment boıynsha bereshegi 5 029 720 teńgege jetken. Zertteý barysynda boryshkerdiń turaqty jumysy, tabysy jáne atyna tirkelgen múlki joq ekeni anyqtalǵan. Sot otyrysynda quqyq buzýshy turaqty jumysynyń bolmaýyna baılanysty mindetin oryndaı almaǵanyn, aldaǵy ýaqytta tólep qutylatynyn kórsetken. Sot qaýlysymen oǵan atalǵan bap negizinde ákimshilik qamaý túrindegi jaza qoldanyldy, — delingen habarlamada.
Eske salaıyq, jýyrda Pavlodar oblysynyń prokýratýrasy alıment boıynsha bereshegi bar azamattardyń býkmekerlik keńselerde qumar oıyndarǵa qatysý faktilerin anyqtady.
