Alık Shpekbaev: Jemqorlyqqa qarsy kózqarasty qalyptastyrý - uzaq protsess
«Adaldyq, ashyqtyq, jaýapkershilik, esep berýshilik - tek sózder ǵana emes. Bul sybaılas jemqorlyqtan azat qoǵamnyń basty qundylyqtary. Qylmystyq sharalar mańyzdy, biraq problemany túbegeıli sheshýdi qamtamasyz etpeıdi. Tipti ólim jazasy sheneýnikterdiń para alýyn áli de toqtatpaǵan Qytaıdyń mysaly osyǵan dálel. Búkil qoǵamnyń aýqymynda sybaılas jemqorlyqqa qarsy kózqarasty qalyptastyrý - bul uzaq merzimdi protsess. Biraq jeke deńgeıde árqaısymyz ony óte tez jasaı alamyz. Eń bastysy - nıet pen erik», - dedi ol.
Onyń atap ótýinshe, azamattyq qoǵam anaǵurlym ashyq jáne belsendirek bola bastady. Memlekettik organdardyń janyndaǵy qoǵamdyq keńestermen birge arnaıy monıtorıngtik toptar memlekettik qyzmetterdiń sapasyn arttyrýǵa aıtarlyqtaı úles qosýda. Memlekettik kórsetiletin qyzmetterdi alý úshin qolaıly jaǵdaılar jasaý boıynsha aýqymdy jumystar júrgizilýde. Yńǵaıly front-keńseleri bar servıstik ákimdikter ashylýda. Formatynda 180-nen astam memlekettik mekeme jumys isteıtin open space engizilýde.
«Jaqynda ǵana ony Shymkent qalasynyń ákimdigi de jasady. Kim biledi, múmkin, bul ákimdikter úshin jańa chellendjdiń basy bolar. Biz ázirlegen «Digital Agent» jáne «Ashyq bıýdjetterdiń ınteraktıvti kartasy» it-ónimderi Qazaqstandaǵy kez kelgen adamǵa memlekettik servısti jaqsartýǵa jáne uıaly telefon arqyly bıýdjettiń shyǵystaryn, qurylys sapasyn, joldar jóndeýin baqylaýǵa teńdesi joq múmkindik beredi. Bıznes-qoǵamdastyq ta aıtarlyqtaı damyp keledi. Bıznesti jáne ınvestıtsııalardy qorǵaýǵa arnalǵan joba sheńberinde bizben 300-den astam kompanııa jumys isteıdi. Olar parasyz - adal bıznesti júrgizýge ózine mindetteme aldy», - dedi agenttik basshysy.
A.Shpektaevtyń aıtýynsha, óskeleń urpaq arasynda sybaılas jemqorlyqqa qarsy kózqarasty damytý úshin elimizdegi barlyq mektepterde «Adal urpaq» klýbtary ashyldy. Kolledjder men joǵarǵy oqý oryndary deńgeıinde akademııalyq adaldyq qaǵıdalaryn jáne olardyń qyzmetiniń ashyqtyǵyn nyǵaıtýǵa baǵyttalǵan «Sanaly urpaq» jobasy iske asyrylýda.
«Memlekettik qyzmetshilerdiń sanasyn transformatsııalaý maqsatynda Memlekettik basqarý akademııasy aýyl jáne aýdan ákimderiniń kópshiligin jobalardy basqarý, tıimdi kommýnıkatsııalar, etıka jáne adaldyqqa úıretti. Sondyqtan, biz olardyń jumysynyń ashyqtyǵy men klıentke baǵdarlanýynyń naqty ulǵaıýyn kútemiz. Adal qoǵamdy qurý shaǵyn isterden bastalady. Solardyń biri satýshylary joq adaldyq dúkenderiniń ashylýy boldy. Jarty jyldyń ózinde «Adaldyq dúkeni» oryndarynyń 3700-den astamy ashyldy: memlekettik organdarda, joǵarǵy oqý oryndarynda, mektepterde, sottarda, tipti polıtsııada. Satyp alýshylarǵa kedergisiz qyzmet kórsetýdi ashyp jatqan «Ramstor» jáne «Magným» sııaqty tanymal sýpermarketter jelileriniń bizdiń ıdeıamyzdy qoldaýy qýantady. Árıne sizder Almaty metrosyndaǵy adaldyq týrnıketi týraly da estigen shyǵarsyzdar. Bul bastama kúsheıe túsýde», - dedi ol.
Agenttik basshysynyń paıymynsha, oń ózgerister bar. Jeke jobalar men is-sharalar aýqymdy emes kórinýi múmkin, alaıda birge olar ortany jáne qoǵamdyq sanany ózgertetin pazldy quraıdy.
«Bizdiń barlyq bastamalarymyz Memleket basshysy ádil atap ótkendeı sybaılas jemqorlyqqa qarsy kúres memlekettiń ǵana emes, barlyq azamattardyń mindeti degen uǵymdy árbir qazaqstandyqtyń sana-sezimine jetkizýge baǵyttalǵan. Dostar, biz Tuńǵysh Prezıdenttiń tapsyrmasyna sáıkes «Sybaılas jemqorlyqtan ada óńirler» respýblıkalyq jobasyn júzege asyrýdamyz #Adaldyq_alany. Memlekettik qyzmettiń sapasyn jaqsartqysy jáne turmystyq sybaılas jemqorlyqty joıǵysy kelgen kez kelgen yntasy bar adam oǵan qosyla alady. Tek sizderdiń belsendi qoldaýlaryńyzben ǵana joba jemqorlyqqa qarsy jalpyulttyq qozǵalysqa aınalady», dedi A.Shpekbaev.