Alık Shpekbaev: Túrme bastyqtary kóbinde sottalǵandarǵa jaǵdaı jasaǵany úshin isti bolady
ASTANA. QazAqparat - QR Memlekettik qyzmet isteri jáne jemqorlyqqa qarsy is-qımyl agenttigi tóraǵasynyń orynbasary Alık Shpekbaev sońǵy úsh jylda qylmystyq-atqarý júıesinde 40 qylmystyq is qozǵalyp, 38 adamnyń isi sotqa berilgenin málim etti, dep habarlaıdy «QazAqparat» HAA tilshisi.
«Sońǵy 3 jylda qylmystyq-atqarý júıesinde sybaılas jemqorlyqqa qatysty 40 qylmystyq is qozǵalyp, 38 adamnyń isi sotqa berildi. Zań aldynda bári teń degen qaǵıdatty ustana otyryp, qatardaǵy qyzmetkerlerden bastap, zań buzǵan jetekshiler de jaýaptan jaltarǵan joq. Osy aralyqta túrmeniń 11 bastyǵy men olardyń orynbasarlary qylmystyq jaýaptylyqqa tartylǵan. Máselen, Jambyl oblysynyń qylmystyq-atqarý departamentiniń bastyǵy sottalýshyǵa jazasyn óteý ornynda jaıly jaǵdaı jasap bergeni úshin sottaldy», - deıdi Alık Shpekbaev Astanada ótken «Túrmelerdi tıimdi basqarý: bas bostandyǵynan aıyrý oryndarynda sybaılas jemqorlyqty joıý» ulttyq jınalysynda.
Agenttik tóraǵasynyń orynbasarynyń aıtýynsha, departamenttiń burynǵy basshysy kolonııa bastyqtarynan aqsha alyp otyrǵany úshin 8 jylǵa sottalyp, múlki tárkilengen. Polkovnık sheninen aıyrylǵan.
«Taldaý jumystary túrme bastyqtarynyń sottalǵandarǵa jaıly jaǵdaı jasaýy sebebinen jaýapqa tartylatyndaryn anyqtap otyr. Mysaldar kóp. Máselen, ShQO-da túrme bastyǵy sottalǵan adamnyń jazasyn jeńildetý úshin 260 myń teńgelik teledıdar syıǵa alǵan. Búgingi tańda zań aldynda bári teń ekenin taǵy da atap ótkim keledi», - deıdi ol.
Aıta keterligi, Astanada tuńǵysh ret «Túrmelerdi tıimdi basqarý: bas bostandyǵynan aıyrý oryndarynda sybaılas jemqorlyqty joıý» taqyrybynda ulttyq jınalys ótip jatyr. Jıynǵa quzyrly vedomstvolardyń basshylary, Parlament Májilisiniń depýtattary men Ulybrııatanııa elshiliginiń ókilderi qatysýda.
