Alık Shpekbaev Shymkentte jumys ýaqytyn tańǵy 8-den keshki 4-ke deıin qysqartýdy usyndy
ShYMKENT. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev Shymkentte jumys ýaqytyn tańǵy segizden bastap, túski úzilisti qysqartýdy usyndy. Bul týraly agenttik tóraǵasy atalǵan qalaǵa jumys sapary barysynda aıtty, dep habarlaıdy QazAqparat tilshisi.
Qala aktıvimen kezdesken agenttik tóraǵasy memlekettik qyzmetkerler úshin jańa jumys kestesin jasaýǵa shaqyrdy.
«Memlekettik qyzmet salasyndaǵy úzdik tájirıbelerge súıene otyryp, biz Shymkent qalasy ákiminiń apparatyna juma kúni jańa jumys kestesin pılottyq rejımde engizýdi usynamyz. ıAǵnı, jumys kúni tańǵy saǵat 8:00-de bastalyp saǵat 16:00-de aıaqtalatyn bolady. Osylaısha, 8 saǵattyq jumys kúni saqtalady. Jáne bul jumys kestesin pılottyq rejımde Shymkentten bastaýdy usynamyn. Sebebi, Shymkent - eń kreatıvti qala», - dedi agenttik tóraǵasy.
Ákim óz kezeginde aıtylǵan usynysty qoldap, agenttik tóraǵasyna senim artqany úshin alǵysyn bildirdi.
Memlekettik organdar basshylarynyń qatysýymen ótken jıynda agenttiktiń Shymkent qalasy boıynsha departamentiniń basshysy Álı Kómekbaev, Sybaılas jemqorlyqqa qarsy is-qımyl ulttyq bıýrosynyń Shymkent qalasy boıynsha departamentiniń basshysy Murat Qarymsaqov, qala ákimi apparatynyń basshysy Erkeǵalı Álimqulov baıandama jasady.
Aıta keteıik, kezdesýde sybaılas jemqorlyqqa qarsy is-qımyl boıynsha elimizde júzege asyrylyp jatqan saıasat pen azamattardyń qajettiligine baǵyttalǵan memlekettik apparattyń aldaǵy perspektıvasy sóz boldy.
