Alık Shpekbaev ShQO-da júzge jýyq ákimmen kezdesti

ÓSKEMEN. QazAqparat - Búgin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev Shyǵys Qazaqstan oblysyna jumys saparymen bardy. Іssapar barysynda ol óńirde qurylǵan QR Prezıdentiniń janyndaǵy Memlekettik basqarý akademııasy fılıalynyń qyzmetimen tanysty, dep habarlaıdy QazAqparat vedomstvonyń baspasóz qyzmetine silteme jasap. 

Óskemen qalasyndaǵy fılıal elimizde memlekettik qyzmetshilerdi oqytýdyń biryńǵaı júıesin qurý aıasynda ashyldy jáne ol óńirdegi memqyzmetshilerdi kásibı damytý ortalyǵyna aınalmaq. Ortasha alǵanda, fılıal bazasynda jyl saıyn oblystaǵy memlekettik organdardyń 2500 qyzmetkeri qaıta daıarlaý men biliktilik arttyrý kýrsynan ótip turady.

Sondaı-aq, akademııa fılıaly memlekettik basqarýda jobalyq menedjmentti qoldaný máseleleri boıynsha konsýltatsııalyq qyzmetter kórsetedi. Bul úshin qajetti ınfraqurylym men professor-oqytýshylyq áleýet bar. 

Alık Shpekbaev oblys ákimi Danıal Ahmetov bastama jasaǵan «Shyǵys Qazaqstan oblysyndaǵy jergilikti ózin-ózi basqarýdy damytý kontekstinde oqytý tásilderin transformatsııalaý» atty bilim berý jobasynyń qatysýshylarymen de kezdesti. Atalǵan joba sheńberinde aýdandyq mańyzy bar qalalardyń, aýyl okrýgteri men kentterdiń 98 ákimi jobalyq basqarý daǵdylary boıynsha oqytýdan ótken bolatyn.

Kezdesý barysynda ákimder aýyl jáne qala aýmaqtarynyń áleýmettik-ekonomıkalyq damýyna, jergilikti bıýdjetti qalyptastyrý men kommýnaldyq menshikti basqarýǵa baǵyttalǵan jobalaryn tanystyrdy. Agenttik tóraǵasynyń qoldaýymen atalmysh jobalarǵa start berildi. 

Mundaı ozyq tájirıbe memlekettik basqarýdyń ınnovatsııalyq quraly retinde turaqty negizde paıdalanylady.