Alık Shpekbaev memlekettik qyzmetshilerdiń jıi aýystyrylý sebebin túsindirdi
ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev memlekettik satyp alýlar salasynda jumys isteıtin memqyzmetshiler arasynda aýys-túıisti jıi jasap turýdyń qajettigin túsindirdi, dep habarlaıdy «QazAqparat» HAA tilshisi.
«Satyp alýlar jáne baqylaý-qadaǵalaý organdarynda jumys isteıtin mamandarmen qııanatqa barmaý jónindegi arnaıy kelisimsharttar jasasa otyryp, olardy jıi almastyrý mindetin bekitý qajet.Álemdik tájirıbege súıensek, memlekettik qyzmetshiler arasynda jıi aýys-túıis júrgizý sybaılas jemqorlyqqa qarsy sharalardyń biri bolyp sanalady. Jemqorlyqtyń joǵary dárejesine ıe laýazymdardy atqaratyn qyzmetshilerdi aýystyrýdyń qajettiligi, qyzmetshiniń sybaılas jemqorlyq quqyqbuzýshylyqtaryna ıtermeleýi múmkin baqylaý-ruqsat berý fýnktsııalaryna uzaq ýaqyt ıe bolýymen baılanysty. Atalǵan shara mundaı qaýip-qaterlerge jol bermeýge baǵyttalǵan», - dep túsindirdi ol «Atameken» UKP Kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda.
Onyń aıtýynsha, Batys Eýropa elderinde rotatsııa ár eki jyl saıyn, jemqorlyqqa anaǵurlym beıim salalarda jyl saıyn júrgiziledi.
Buǵan deıin habarlanǵandaı, 2017 jyldyń birinshi toqsanynda memlekettik satyp alýlar salasynda 73 sybaılas jemqorlyq qylmysy tirkelgen, onyń 32-si sotqa jiberildi. Sybaılas jemqorlyqqa qarsy qyzmet derekterine sáıkes, bul salada sotqa tartylǵandar sany 40% ulǵaıǵan.
