Alık Shpekbaev memlekettik basqarý júıesiniń ózgerýine ne yqpal etkenin aıtty

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev jemqorlyqpen kúreste qoǵamdyq uıym ókilderiniń qosyp jatqan úlesi týraly aıtyp berdi, dep habarlaıdy QazAqparat tilshisi.

«2015-2025 jyldarǵa arnalǵan Sybaılas jemqorlyqqa qarsy strategııanyń júzege asyrylyp jatqanyna bes jyl boldy. Arnaıy monıtorıng toby jumys bastaǵaly tórt jyldan asyp ketti. Qazir qoǵamdyq mańyzyna baılanysty arnaıy monıtorıng tobynyń mártebesi erekshe. Bul degenińiz - bizdiń qoǵamnyń belsendi ekenin, jemqorlyqqa qarsy kúreste memlekettik organdarǵa kómek kórsetip jatqanyn pash etedi. Ýákiletti organ qylmystyq qýdalaýdan buryn onyń sebepteri men aldyn alý máselesin mańyzdy sanaıdy. Kóp másele sheshimin tapty. Búgingi kúni jumysymyzǵa jaqsy baǵa berilip jatsa, ol - eń aldymen arnaıy monıtorıng tobynyń eńbegi. Keıingi 3 jylda jemqorlyq jaǵdaıynyń turaqty túrde azaıyp jatqanyn atap ótkim keledi», - dedi Alık Shpekbaev elordada arnaıy monıtorıng tobynyń otyrysynda.

Agenttik basshysy sonymen qatar, top múshelerine qoldaý bildirý kerektigin de atap ótti.

«Parasattylyqtyń halyqqa jarııa reıtıngin engizip jatyrmyz. Onda memlekettik organdardyń ashyqtyǵy men bılik ókilderiniń qoljetimdiligi saralanady. Bıyl 100 servıstik ákimdik ashyldy. 2020 aýdan «open space» - ashyq ári erkin keńistik formatyna ótip ketti. Bul degenińiz memlekettik basqarý júıesiniń ózgerip jatqanyn kórsetedi. Sonymen qatar, front-keńse ashý arqyly 300 memlekettik mekeme transformatsııadan ótti», - deıdi Sybaılas jemqorlyqqa qarsy qyzmet basshysy.