Alık Shpekbaev: Qazaqstandyqtardyń jartysynan kóbi jemqorlyq azaıǵanyn atap ótken

NUR-SULTAN. QazAqparat – Qazaqstandyqtardyń jartysynan kóbi paraqorlyq deńgeıiniń tómendegenin atap ótken. Bul týraly elordada ótken V jyl saıynǵy sybaılas jemqorlyqqa qarsy konferentsııada aıtyldy, dep habarlaıdy QazAqparat tilshisi.

«Elimizde jemqorlyqqa qarsy reformalar boıynsha júıeli jumystar júrgizilip jatyr. Sarapshylar Qazaqstandaǵy jemqorlyq jaǵdaıyna qatysty saraptama júrgizdi. Elimizdegi azamattardyń jartysynan kóbi sońǵy jyldary jemqorlyq deńgeıi tómendegenin aıtqan. Al saýalnamaǵa qatysqan 76-dan astam kásipker Qazaqstanda kásibińdi tek zań aıasynda damytýǵa bolatynyn aıtqan», - dedi QR Sybaılas jemqorlyqqa qarsy is-qımyl agenttiginiń basshysy Alık Shpekbaev.

Onyń aıtýynsha, Dúnıejúzilik bank álemdegi 214 eldiń memlekettik basqarý ındıkatory aıasynda «Jemqorlyqty baqylaý» kórsetkishin egjeı-tegjeıli zertteıdi.

«Sońǵy málimetterge sáıkes, Qazaqstan TMD elderin basyp ozyp, atalmysh ındıkator boıynsha óziniń eń jaqsy nátıjesin kórsetti. Az nárse istelgen joq. Biraq biz munymen toqtap qalmaımyz. Bul konferentsııa jemqorlyqtyń aldyn alý deńgeıi men sapasyna tikeleı qatysty máselelerge arnalǵan», - deıdi ol.