Alık Shpekbaev qaramaǵyndaǵy qyzmetkerleriniń jalaqysyn aıtyp berdi
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń basshysy Alık Shpekbaev memlekettik qyzmetshilerge jalaqy tóleýdiń jańa júıesin ilki engizýdiń aldyn ala qorytyndysyn shyǵardy, dep habarlaıdy QazAqparat tilshisi.
«Eger jalaqy tóleýdiń jańa júıesine qatysty aıtar bolsaq, onda bizdiń ilki organdardaǵy jalaqy kólemi eki esege ulǵaıdy. Astana men Mańǵystaý oblystarynyń ákimdikterinde 2,2-den 2,5 esege deıin artty. Bul aıtarlyqtaı soma. Ortasha alǵanda jeke sektordaǵy jalaqymen saı keledi dep aıtýǵa bolady. Jeke sektordaǵy eń tómengi jalaqy 165 myń teńge. Búginde bizdiń mamandar, tómengi býyn sarapshylary dál sondaı jalaqy alady. Buǵan qosa, biz ortalyq pen óńirler arasyndaǵy jalaqy teńsizdigin joıdyq. Aıyrmashylyq shamamen 70 paıyz bolatyn. Eger ol ortalyqta jumys isteıtin bolsa, árıne, onyń jalaqysy sál joǵary bolady. Biraq, aıyrmashylyq 10-20 paıyz ǵana»,- dedi agenttik basshysy «Jastar» ǵylymı-zertteý ortalyǵy sarapshylyq klýbynyń otyrysynda.
Onyń aıtýynsha, agenttik ǵylymı ádistemeler negizinde óz apparatynyń qurylymyn 30 paıyzǵa ońtaılandyrylǵan. Nátıjesinde jekelegen qurylymdar, laýazymdar joıylǵan. Jekelegen basqarmalar biriktirilip, orynbasar laýazymdary alynyp tastaldy.
«Sonyń esebinen ortalyq apparattyń ózindegi jalaqyny 50-den 60 paıyzǵa deıin ósirdik. Eger jeke sektordaǵy ortasha jalaqy 165 myń teńge desek, onda qazir bizdiń agenttikte 165 myńnan bastap 220 myń teńge deıin jalaqy alady. Ol bastyq bolsa onda jalaqysy shamamen 300 myńǵa jetedi. Al 300 myń degenimiz ortalyq memlekettik organdardyń, ıaǵnı mınıstrlik dırektorynyń jalaqysy. Demek, búginde bizdiń eń tómengi býyndaǵy sarapshylar ortalyq memlekettik organnyń dırektorymen birdeı jalaqy alyp otyr. Buǵan qosa, jyldyń sońynda bonýs bar», - dedi ol.
Agenttik basshysynyń sózine qaraǵanda, bonýs júıesinde keminde 4 laýzymdyq jalaqy tóleý qarastyrylǵan.
«Eger sarapshy tıimdi jumys istese, onda soǵan sáıkes jyldyń sońynda 10 aılyqqa deıin bonýs alady. Bul shamamen 3 mln teńge. Búgin 40 sharshy metr bolatyn eki bólmeli páter naryqta 12 mln turady. Ol birden nesıeniń tórtten birin birden jaba alady. Al 3-4 jyldyń ishinde barlyq qaryzyn jaýyp tastaıdy. Barlyq memlekettik organdar birtindep faktorlyq-balldyq júıege kósher bolsa, buǵan qol jetkize alamyz», - dedi Alık Shpekbaev.
