Alık Shpekbaev Indonezııa Elshisimen kezdesti

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiniń tóraǵasy Alık Shpekbaev Indonezııanyń Tótenshe jáne Ókiletti Elshisi Rahmat Pramonomen kezdesti, dep habarlaıdy QazAqparat.

Agenttiktiń Feısbýktegi jazbasyna sáıkes, Alık Shpekbaev vedomstvonyń memlekettik qyzmetti jetildirý, sapaly memlekettik qyzmet kórsetý jáne olardy elektrondy formatqa kóshirý, memlekettik jemqorlyqqa qarsy saıasat baǵyttaryndaǵy júıeli jumystary jaıynda aıtyp berdi.

«Sońǵy jyldary Qazaqstanda memlekettik qyzmet, memlekettik basqarý jáne jemqorlyqqa qarsy is-qımyl salalarynda aýqymdy jumystar júrgizilip jatyr. Elimizde basty basymdyqtar anyqtalǵan - olar ashyqtyq, aıqyndyq jáne eseptilik. Memleket basshysynyń saıası erik-jigeriniń jáne bastamalarynyń halyq arasynda keńinen qoldaýǵa ıe bolýynyń, memlekettik apparattyń tıimdi jumysynyń arqasynda sınergetıkalyq tıimdilik baıqap otyrmyz. Jemqorlyqqa qarsy tıimdi is-qımyl tetikteri barynsha qarqyndy damı bastady», - dedi agenttik tóraǵasy.

Óz kezeginde sheteldik dıplomat Qazaqstanda júrgizilip jatqan reformalarǵa joǵary baǵa berdi.

«Aldymen Qazaqstandy jemqorlyqqa qarsy is-qımyl máselelerindegi aıtarlyqtaı ilgerileýshiligimen quttyqtaǵym keledi. Bul máseledegi Qazaqstannyń kúsh-jigeri halyqaralyq deńgeıde atalyp ótilgen jáne nátıjesinde elderimiz Jemqorlyqty túısiný halyqaralyq ındeksindegi óz kórsetkishin jaqsartty», - dep atap ótti Indonezııa Elshisi.

Osy oraıda Alık Shpekbaev Indonezııanyń memlekettik qyzmet salasyndaǵy jáne jemqorlyqqa qarsy is-qımyl máselesindegi tájirıbesin zerdeleýge barynsha qyzyǵýshylyq tanytty. Kezdesý sońynda taraptar memlekettik basqarý máselelerinde tájirıbe almasý úshin eki eldiń memlekettik qyzmetshilerin ózara granttyq oqytý jáne taǵlymdamadan ótkizý múmkinshilikterin talqylady.