Alık Shpekbaev «Halyq zańgeri» aktsııasy sheńberinde kókshetaýlyqtardy qabyldady

KÓKShETAÝ. QazAqparat - QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev «Halyq zańgeri» aktsııasy sheńberinde Kókshetaý qalasy turǵyndaryn qabyldady, dep habarlaıdy QazAqparat tilshisi vedomstvonyń Aqmola oblysy boıynsha departamentiniń baspasóz qyzmetine silteme jasap.

Vedomstvonyń málimetinshe, halyqqa tegin zańgerlik kómek kórsetý jáne olardyń quqyqtyq saýattylyǵyn arttyrý maqsatynda Kókshetaý qalasynda jalpy respýblıkalyq «Halyq zańgeri» aktsııasy ótti.

Halyqqa joǵary bilikti zańgerlik kómek kórsetý úshin ártúrli salalardan 36 kásibı zańger jumyldyryldy. Olardyń ishinde tanymal qorǵaýshylar, notarıýstar, prokýrorlar, tergeýshiler, sot oryndaýshylary, ádilet qyzmetkerleri, memlekettik organdardyń basshylary boldy.

Aktsııaǵa Agenttik tóraǵasy Alık Shpekbaev jáne Aqmola oblysynyń ákimi Ermek Marjyqpaev qatysyp, túrli máseleler boıynsha azamattarǵa konsýltatsııalyq kómek kórsetti.

Sonymen qatar, oblys turǵyndary elimizdiń eń myqty qorǵaýshylarynyń biri - Aıman Omarovadan tegin keńes ala aldy.

«Atalmysh aktsııa Qazaqstan Respýblıkasynyń Sybaılas jemqorlyqqa qarsy is-qımyl agenttiginiń, Zakon.kz jelilik basylymynyń jáne «Paragraf» aqparattyq júıesiniń birlesip uıymdastyrýymen ótkizildi.

Oblys turǵyndary ataýly áleýmettik kómek taǵaıyndaý, sot aktilerin oryndaý, salyq aýdarymdary, áleýmettik qorǵaý, jerge qatysty saýaldaryn qoıdy.

Aktsııa tek Kókshetaý qalasynda ǵana emes, oblystyń barlyq aýdandarynda ótip, sonyń arqasynda shalǵaı óńirlerdiń turǵyndary da tegin bilikti kómek aldy«, - deıdi vedomstvonyń baspasóz qyzmetindegiler.