Alık Shpekbaev: Bıznesmenderden túsken shaǵymdardyń 90 paıyzyn sheshtik

ASTANA. QazAqparat - Bıznesmenderden túsken shaǵymdardyń 90 paıyzyn oń sheshtik. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev aıtty, dep habarlaıdy QazAqparat tilshisi.

«Qazirgi ýaqytta agenttiktiń súıemeldeýinde jalpy somasy 11,7 trln teńgeni quraıtyn shamamen 300 bıznes joba bar. Bizge bıznesmenderden 400-den astam shaǵym túsip, onyń 90 paıyzy oń sheshildi. Qalǵan 10 paıyzy taıaý ýaqytta sheshiletin bolady», - dedi agenttik basshysy búgin Kásipkerlerdiń sybaılas jemqorlyqqa qarsy is-qımyly jónindegi ІІІ respýblıkalyq forýmda.

Onyń aıtýynsha, ótken jyly agentti QR Syrtqy ister, Indýstrııa jáne ınfraqurylymdyq damý mınıstrlikterimen birlesip, kásipkerler men ınvestorlardyń quqyqtary men zańdy múddelerin qorǵaýǵa baǵyttalǵan «Protecting business and investments» jobasyn iske qosqan.

«Shetel ınvestıtsııasyna óńirlik básekelestiktiń kúsheıe túsýi turǵysynan alǵanda atalǵan joba Qazaqstannyń Ortalyq Azııadaǵy básekelestik basymdyǵyn arttyrýǵa aıtarlyqtaı úles qosyp, eldegi adal bıznes ortanyń damýyn yntalandyrady. Bul joba bıznes júrgizýdegi aǵymdyq máselelerdi sheshýge baǵyttalǵan ýaqytsha shara ekendigin basa aıtqym keledi. Bizdiń negizgi maqsatymyz - memorgandardyń bızneske bet burǵyzý, sheneýnikterge bızneske kómektesýge ári qoldaýǵa úıretý. Oǵan qol jetkizgennen keıin jobany jalǵastyrý qajettiligi ózinen-ózi ózektiligin joıady», - dedi Alık Shpekbaev.