Alık Shpekbaev Bertelsmann nemis sarapshylarymen kezdesti

NUR-SULTAN. QazAqparat - Sybaılas jemqorlyqqa qarsy is-qımyl agenttiginiń tóraǵasy Alık Shpekbaev Bertelsmann nemis Qorynyń aǵa dırektory Shtefan Empter bastaǵan sarapshylar tobymen kezdesti, dep habarlaıdy QazAqparat.

Taraptar Qazaqstannyń ózekti áleýmettik - saıası jáne sybaılas jemqorlyqqa qarsy reformalaryn talqylap, memlekettik basqarý júıesindegi transformatsııa men jemqorlyqty joıý arasyndaǵy ajyramas baılanysty atap ótti.

Alık Shpekbaev sheteldik sarapshylardyń suraqtaryna jaýap bere otyryp, sybaılas jemqorlyqqa qarsy zańnamanyń jańashyldyqtaryn quqyq qoldaný týraly egjeı-tegjeıli baıandady. Atap aıtqanda, bul memlekettik organdar men uıymdar basshylarynyń qaramaǵyndaǵy qyzmetkerlerdiń sybaılas jemqorlyǵy úshin jaýapkershilikke tartýdyń, jurtshylyqty jumyldyra otyryp, sybaılas jemqorlyqqa qarsy saraptama júrgizýdiń, sondaı-aq sybaılas jemqorlyq faktileri týraly habarlaǵany úshin azamattardy kótermeleýdiń saralanǵan júıesiniń tájirıbesi týraly boldy.

Sarapshylar úshin azamattyq qoǵamdy sheshim qabyldaý protsesine jáne sybaılas jemqorlyqqa qarsy bastamalarǵa tartý sharalary erekshe qyzyǵýshylyq týdyrdy. «Biz ilgerileýdi kórip otyrmyz. Uzaq merzimdi keleshekte Sizderdiń qoǵamdy keńinen qatystyrýdy qamtamasyz etý jónindegi jumystaryńyz – zańnamany únemi jetildirý sekildi mańyzdy bolyp tabylady», - dep atap ótti Qordyń aǵa sarapshysy Sabıne Donner.

Qor ókilderi tańdalǵan baǵyttyń artyqshylyqtaryn kórsete otyryp, sybaılas jemqorlyqqa qarsy is-qımyldaǵy keshendi tásildi joǵary baǵalady. Jalpy, olar qabyldanyp jatqan zańnamalyq sharalardyń ózektiligin aıqyndap, olardy sapaly iske asyrý azamattardyń ál-aýqatyn arttyrýǵa oń áser etetinin atap ótti.