Alık Shpekbaev asta-tók toı jasaıtyn memlekettik qyzmetshilerdi synǵa aldy

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev memlekettik qyzmetshilerdiń balalaryna toı jasap berýin «dańǵoılyq jármeńkesine» teńedi, dep habarlaıdy QazAqparat.

«Sán-saltanaty kelisken aýqymdy toılardyń beınebaıany áleýmettik jelide jıi jarııalanady. Zal ishi tolǵan gúl. Shoý-bıznes juldyzdary. 500-600 qonaq. Keıinirek bul toıdy óńirdegi bir basqarma basshysynyń qyzyna nemese ulyna jasap bergeni anyqtalady. Jáne bul tutas bir úrdiske aınaldy. Osyndaı beınerolıkter jelige taraıdy jáne jurtshylyqty «Aqshany qaıdan aldy?» degen oryndy suraq mazalaıdy. Osy jerde taǵy bir mańyzdy másele týyndaıdy. Qatardaǵy memlekettik qyzmetshiler de basshylarynan qalmaı, merekeni áli jetkenshe dúrkiretip ótkizýge tyrysady. Bul endi dańǵoılyq jármeńkesi emeı, nemene», - dep jazdy Alık Shpekbaev áleýmettik jelidegi paraqshasynda.

Onyń aıtýynsha, keıbir memlekettik qyzmetshiler úshin balalarynyń úılený toıyn nemese óziniń mereıtoıyn ulan-asyr toımen atap ótý ádetke aınaldy.

«Tipti janaza rásimin de «laıyqty deńgeıde» ótkizýge tyrysatyndar bar», - deıdi tóraǵa.

Sonymen birge, Shpekbaev 2015 jyldan beri memlekettik qyzmetshiler arasynda etıkalyq tártipti buzý oqıǵalarynyń 40%-ke azaıǵanyn atap ótti. Ol memlekettik qyzmetshilerdi ózgerýge, qarapaıym bolýǵa shaqyrdy.

«Qurmetti memlekettik qyzmetshiler, ózgerý - ýaqyt talaby. Qarapaıym ári kishipeıil bolýymyz kerek!», - dep jazdy ol.