Alık Shpekbaev Almatydaǵy «OŃAI» júıesimen tanysty
Búginde Almatydaǵy barlyq tsıfrlyq jobalar úsh basty prıntsıp negizinde iske asyrylýda. Birinshi kezekte - ashyqtyqty qamtamasyz etý jáne jemqorlyq jaǵdaılaryn boldyrmaý, ekinshisi - ekonomıkalyq qaıtarym, úshinshisi - memlekettik qyzmet jáne qala turǵyndary úshin jaılylyq sapasyn arttyrý.
Osylaısha, Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Almatynyń Kólik holdınginde «Ońaı» elektrondyq júıesi men qoǵamdyq kólikti dıspetcherlendirý júıesiniń aralyq qorytyndylarymen tanysty.
«OŃAI» júıesi men avtomattandyrylǵan kólik turaqtary mıllıardtaǵan qarjyny «kóleńkeden» shyǵaryp, olardy qala ekonomıkasyna tartýǵa múmkindik berdi. Qoǵamdyq kólikte aqshasyz tólem jasaý úlesi 98 paıyzdan asqan, bul - kúnine 1 mln astam tranzaktsııa. Sala «kóleńkeden» tolyq shyǵaryldy. Budan basqa, eger ótken eki jylda Almatyda 634 qoǵamdyq kólik satyp alynsa, bıyl 716 jańa avtobýs júre bastaıdy.
Polıtsııa departamentiniń Jedel basqarý ortalyǵynda agenttik tóraǵasyna damyǵan beınebaqylaý júıeleriniń engizilýi men «102» qyzmetiniń sapasyn arttyrý boıynsha qoldanylyp otyrǵan sharalar jóninde aıtyp berdi.
Qazirgi tańda Almatyda qoǵamdyq jáne jol qaýipsizdigin arttyrý maqsatynda jyldamdyq rejıminiń buzylýyn avtomatty túrde anyqtaıtyn «RoadScanSpeed» júıesi, belgilengen jolaqqa shyǵyp ketýdi fotoǵa túsirip alatyn «Jolaq» júıesi, «Qaýipsiz aýla» baǵdarlamasy boıynsha beınekameralar jáne t.b. jobalar iske asyrylýda.
