Alık Shpekbaev Aqtóbedegi «servıstik ákimdiktiń» qyzmetin tekserdi

AQTÓBE. QazAqparat - Sybaılas jemqorlyqqa qarsy is-qımyl agenttiginiń tóraǵasy Alık Shpekbaev eki kúndik jumys saparymen Aqtóbege keldi, dep habarlaıdy QazAqparat tilshisi.

Alık Shpekbaev aldymen Hromtaý aýdandyq memlekettik kirister basqarmasyna baryp, ondaǵy jumyspen tanysty. Keıin Hromtaý aýdany ákimdigi janyndaǵy «Servıstik ákimdiktiń» qyzmetin tekserip, azamattardy jeke qabyldady. Sybaılas jemqorlyqqa qarsy vedomstvo basshysyna negizinen turǵyn úı sharýashylyǵy, jer qatynastary sekildi áleýmettik máseleler jóninde suraq qoıyldy. Turǵyndar Hromtaý qalasynyń keıbir shaǵyn aýdandarynda baılanys qyzmetin jaqsartý, múgedektigi bar balany ákesimen birge jataqhananyń 1-qabatyna kóshirý úshin kómek kórsetý, jumysqa ornalastyrý sekildi birqatar ótinish aıtty.
«Aýmaqtyq departamentke árbir ótinishti jekeleı zerdelep, turǵyndardyń jaǵdaıyn egjeı – tegjeıli túsinýge tapsyrma berildi. Másele sheshimin tabatyn bolady», - dedi Alık Shpekbaev. Qabyldaý barysynda turǵyndar «Bir tereze» qaǵıdaty boıynsha azamattarǵa jedel jáne kedergisiz qyzmet kórsetýge arnalǵan jergilikti «Servıstik ákimdiktiń» jumysyn oń baǵalady. Munda azamattardy jeke qabyldap, keńes berý úshin «Open Space» formatyndaǵy kabınet jabdyqtalǵan. Hromtaý aýdanynyń «Ashyq ákimdigine» jyl basynan beri barlyǵy 600-den astam ótinish, 500-den astam aryz jáne ózge de saýal kelip tústi. 95 adam ákimniń jeke qabyldaýynda bolǵan. Munda atqarýshy organdar jyl basynan beri barlyǵy 8103 qyzmet kórsetken. Memleket basshysy Q.Toqaevtyń bastamasymen qolǵa alynǵan «Halyq únine qulaq asatyn memleket» tujyrymdamasy negizinde Agenttik azamattyq qoǵammen ózara is-qımyldy kúsheıtýde.
«Memlekettik organdardyń ashyqtyǵy men qoljetimdiligin arttyrýdyń tıimdi quraly - halyq aldynda esep berýdi qamtamasyz etý. Sondyqtan halyqpen múmkindiginshe jıi kezdesip, pikirin tyńdap, máselelerin jedel sheshý kerek» - dedi Agenttik tóraǵasy.
Jalpy búgingi kúni Aqtóbe oblysynyń barlyq aýdandyq jáne qalalyq ákimdiginde 15 «Servıstik ákimdik» jáne «Open Space» formatyndaǵy 65 kabınet jumys isteıdi.
Agenttik tóraǵasy Hromtaý aýdanynyń birqatar mekemelerin aralaǵannan keıin aýdan turǵyndarymen kezdesip, olardy tolǵandyrǵan barlyq suraqqa jaýap berdi. Halyqpen kezdesýde Alık Shpekbaev sybaılas jemqorlyqqa qarsy zańnamaǵa engizilgen ózgertýlerge toqtaldy.

Erteń kásipkerlermen kezdesip, «Protecting business and investment» jobasynyń iske asyrylý barysymen tanysady.