Alık Shpekbaev «Aqmola – adaldyq alańy» jobasymen tanysty
NUR-SULTAN. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev Aqmola oblysyna is-sapary barysynda Aqkól aýdanynyń belsendilerimen kezdesti, dep habarlaıdy vedomstvonyń baspasóz qyzmeti.
Kezdesýde Aqmola oblysy ákiminiń orynbasary, «Aqmola - adaldyq alańy» jobasynyń kýratory Qanat Idrısov turmystyq jemqorlyqty azaıtý jáne azamattar úshin qolaıly jaǵdaı jasaý boıynsha jobany iske asyrýdyń nátıjelerimen tanystyrdy.
Mańyzdy jańa bastamanyń biri, onyń aıtýynsha, balalardy mektepke qabyldaý jáne retteý boıynsha aqmola.kz júıesin odan ári jetildirý, sol arqyly atalǵan úderistiń ashyqtyǵyn jáne jarııalylyǵyn qamtamasyz etý. Bul shara balalardy birinshi synyptarǵa irikteý barysynda týyndaıtyn turmystyq jemqorlyq táýekelderin joıyp otyr. Buǵan deıin mekteptiń ákimshiligimen kelisý arqyly synyptardy óz qalaýynsha qalyptastyrý, nemese belgili bir balalardy «myqty» synyptarǵa, bedeli jáne kásibı dárejesi joǵary muǵalimderge berý kezdesken.
«Kez kelgen ata-ana óz balasyn zor eńbegi sińgen jáne bedeli joǵary pedagogtardyń synyptaryna, basqa sózben aıtqanda «qajetti» synypqa ornalastyrý múmkindigine ıe bolyp, qalǵan synyptar bolsa qaldyq qaǵıdaty boıynsha quryldy. Bul ata-analardyń da, muǵalimderdiń de narazylyǵyn týdyrdy. Osyǵan oraı jobalyq keńse atalǵan jańashyldyqty engizýdi jón kórdi. Búgingi tańda balalardy synyptarǵa irikteý úderisi avtomattandyryldy», - dep málimdedi Qanat Idrısov.
Sonymen qatar jobanyń kýratory Agenttik Tóraǵasyn jobalyq keńseniń quramymen tanystyrdy. Qazirgi ýaqytta jobalyq keńsede 13 adam jumys isteıdi. Ol túrli salalardan shyqqan, azamattyq jáne memlekettik sektorlardyń ókilderi. Sonymen qatar jobanyń árbir baǵyty boıynsha jobalyq toptar men sarapshylar keńesi jumys isteıdi. Olarǵa shamamen 60-tan astam qoǵam ókilderi tartyldy. Oǵan qosa árbir aýdanda jáne oblystyq mańyzy bar qalada jobany jergilikti jerlerde iske asyrý úshin jaýapty azamattyq jáne memlekettik qyzmetshiler bar. Osylaısha, búgingi tańda «Aqmola - adaldyq alańy» jobasy óz ortasyna jemqorlyqqa qarsy barlyq bastamalardy biriktirip, barlyq qoǵam tartylǵan jemqorlyqqa qarsy qozǵalystyń ortalyǵy bolyp otyr.
