Alık Shpekbaev agenttik sybaılas jemqorlyqqa qarsy súıemeldeýge alǵan bıznes-jobalardy atady
Onyń aıtýynsha, 19 tamyzda ótken sybaılas jemqorlyqqa qarsy is-qımyl máseleleri jónindegi keńeıtilgen keńeste Memleket basshysy osy baǵytty kúsheıtýge basa nazar aýdarǵan.
«Bul másele jyl saıynǵy Joldaýda da naqty aıqyndaldy. Shaǵyn jáne orta bıznes COVID-19 pandemııasy jaǵdaıynda qıyn kezeńdi bastan keshýde jáne burynǵydan da zor qoldaýdy qajet etedi. Osy turǵydan alǵanda kásipkerlik qyzmetke zańsyz aralasý «memleketke qarsy eń aýyr qylmys» retinde qarastyrylýy tıis.
Shaǵyn bıznes boıynsha halyqaralyq keńestiń (ICSB) derekterine sáıkes, ShOB álemdegi barlyq kásiporyndardyń 90%-dan astamyn qurap, shamamen halyqty jalpy 70% jumyspen qamtýdy jáne JІÓ-niń 50%-yn qamtamasyz etedi. Bul turǵyda azamattardyń ál-aýqaty jeke sektordaǵy isterdiń ahýalyna tikeleı baılanysty ekenin naqty túsiný qajet.
Bul – salyq túsimderi, jumys oryndaryn qurý, jańa tehnologııalar jáne adam kapıtalyn damytý. Bir sózben aıtqanda, bıznes memleketke halyq aldyndaǵy áleýmettik mindettemelerdi oryndaýǵa kómektesedi. Biz bızneske neǵurlym tıimdi jaǵdaı jasasaq, soǵurlym ol ónimdi jumys istep, qoǵamǵa paıda ákeledi», - dedi Alık Shpekbaev.
Onyń aıtýynsha agenttik sońǵy úsh jylda sheneýnikterdiń zańsyz aralasýynan myńnan astam kásipkerdiń múddesin qylmystyq-quqyqtyq sharamen qorǵaǵan. Bul jumys jalǵasyn tappaq. Sonymen qatar, Sybaılas jemqorlyqqa qarsy qyzmettiń árbir ofıtserine bıznes isine aralasý faktilerine jol bermeý týraly jeke eskertilgen.
«Búgin men keshendi aldyn alý baǵytyna tolyǵyraq toqtalǵym keledi. 2018 jyldan bastap biz Syrtqy ister mınıstrligimen, «Kazakh Invest «UK» AQ-men jáne «Atameken» UKP-men birlesip «Protecting business and investments» jobasyn iske asyryp kelemiz. Qazirgi ýaqytta oǵan jańa serpin berildi.
Negizgi maqsat – bıznes pen ınvestorlardyń qyzmet úderisterin sybaılas jemqorlyqqa qarsy súıemeldeý arqyly olardyń memlekettik bılik ınstıtýttaryna senimin arttyrý.
Bul kásipkerlerdiń týyndaǵan máselelerin sheshýde quqyqtyq alań aıasynda kómek kórsetýdi bildiredi. Ókinishke oraı, olar kóp jaǵdaıda bıýrokratııalyq kidirister men qaǵazbastylyqty bastan keshire otyryp, «kabınetter aralaýǵa» májbúr. Alaıda, olar jalǵyz kúresýge tıisti emes», - dedi Alık Shpekbaev.
Búgingi tańda agenttiktiń aýmaqtyq departamentteri sybaılas jemqorlyqqa qarsy súıemeldeýmen jalpy ınvestıtsııa somasy 12 trln teńgeden asatyn 500-den astam bıznes-joba júzege asyrýda.
«Jobalardyń 20%-y – sheteldik ınvestorlardyń salymy. Olardyń kóbisi Qytaı, Reseı, Germanııa jáne Túrkııa elderinen. BAÁ, AQSh, Polsha, Nıderland jáne basqa da elderdiń bıznesmenderiniń qatysýyn atap ótkim keledi. Іs júzinde árbir ekinshi joba – óńdeý ónerkásibi salalarynda, árbir besinshi joba – aýyl sharýashylyǵynda iske asýda.
Biz ilespe bıznes júginetin problemalyq máselelerdi zerttedik. Olar negizinen ınvestorlyq vızalarǵa, lıtsenzııalarǵa, salyq salýǵa, kedendik bajdarǵa, jospardan tys tekserýlerge jáne jer qatynastaryna qatysty.
Sonymen qatar, bıznespen jumys «bir qaqpanyń oıyny» bolmaýy kerek ekenin atap ótemin. Kásipkerlerdiń ózderi memlekettik organdarmen ózara is-qımyl kezinde zańsyz is-áreketterdiń bastamashysy bolatyn jaǵdaılar jıi kezdesedi», - dedi Alık Shpekbaev.
Onyń aıtýyna, agenttiktiń bıznes-jobany sybaılas jemqorlyqqa qarsy súıemeldeýiniń negizgi sharty – sheteldik, sondaı-aq otandyq ınvestor birdeı shartta adal bıznes júrgizýge mindettenetin kelisimge qosylý.
«Bul baǵytta kásipkerlerdiń sanasyn ózgertý mańyzdy. Іsterdi júrgizý kezinde parasattylyq berik standart bolýy kerek. Buǵan halyqaralyq uıymdardyń birqatar usynymdary, atap aıtqanda, «Shyǵys Eýropa men Orta Azııadaǵy bıznestiń parasattylyǵy» jáne «Bıznesti jaýapty júrgizý» atty EYDU-nyń sybaılas jemqorlyqqa qarsy standarttary men zertteýleri dálel bola alady.
Bul úderis kvazımemlekettik sektorda sybaılas jemqorlyqqa qarsy komplaens ınstıtýtyn tolyqqandy engizýmen aıtarlyqtaı jandanady. Tıisti zań jobasyn Májilis jáne birinshi oqylymda Senat maquldady.
Eger sizdiń bıznes-jobańyz iskerlik parasattylyq qaǵıdattaryn saqtaı otyryp jumys isteýge daıyn bolsa, biz óz tarapymyzdan sizdi qoldap, sybaılas jemqorlyq kórinisteri men ákimshilik tosqaýyldardan qorǵaýǵa daıynbyz», - dedi Alık Shpekbaev.
Agenttik basshysy antıkor-súıemeldeýge ótinim berý jáne kelisimge qosylý týraly suraqtar bolsa, +7 (707) 350-63-07 jáne +7 (701) 575-40-37 (WhatsApp) telefondary boıynsha jobalyq keńseniń úılestirýshilerine júginýge bolatynyn jetkizdi. Olar aýmaqtyq departamentteri janyndaǵy «Antikor Ortalyǵy» servıstik ortalyǵynda Antıkor men óńirlik kásipkerler palatasynyń qyzmetkerlerimen kezdesýdi qamtamasyz etedi.
