Alık Shpekbaev «Adaldyq saǵatyn» ótkizdi

NUR-SULTAN. QazAqparat – Nur-Sultan, Almaty, Shymkent qalalary men óńirlerdegi barlyq orta bilim mekemelerinde biryńǵaı jalpyrespýblıkalyq «Adaldyq saǵaty» ótti, dep habarlaıdy QazAqparat tilshisi.

Іs-shara óskeleń jas urpaqtyń boıynda adaldyq, parasat, ádildik, senim qundylyqtaryn sińirýge jáne jas býynnyń rýhanı bolmysyn bekitip, sybaılas jemqorlyqqa qarsy mádenıetin qalyptastyrý maqsatynda ótkizilip otyr. Sonymen qatar, 2050 jyly 30 damyǵan eldiń qataryna qosylǵan, básekege qabileti, sanaly, ekonomıkasy damyǵan parasatty myqty memleket qalyptastyra, parasat paıymy ushqyr, jan-jaqty tulǵalardyń sanyn kóbeıtýge atsalysý maqsaty da kózdelgen.

«Jańa zaman jastary bilimmen qatar adaldyq, parasat, ádildik pen senim sekildi adamı qundylyqtardy da boıyna sińirýi qajet. Búgingi kúngi «Adaldyq saǵaty» da - sol jumystardyń bastamasy. Elimizdegi barlyq mektepte «Adal urpaq» erikti mektep klýbtarynyń músheleri óńirlerdegi aımaqtyq basqarma basshylarynyń oń qoly bolyp, ózindik jastyq kreatıvpen, qulshynyspen qoǵamdaǵy qaterli derttiń aldyn alý jumystaryna da jumylýy qajet», - dedi Alık Shpekbaev aktsııany bastaı otyryp.

Atalǵan is-sharaǵa Nur-Sultan, Almaty, Shymkent jáne oblystardyń bilim basqarmalary arqyly orta bilim berý mekemelerinde «Nur Otan» partııasynyń músheleri, agenttiktiń arnaıy monıtorıngtik top músheleri jáne úkimettik emes uıymdarynyń, respýblıkalyq jastar uıymdarynyń ókilderi, sondaı-aq basqa da qoǵam belsendileri qatysty.

Jalpyrespýblıkalyq aktsııa ártúrli formatta ótti. Jasóspirimder óz usynystaryn, oılaryn jetkizdi. Jalpy aktsııaǵa respýblıka boıynsha 2 mln oqýshy qatysty. Sharaǵa 5903 mektep jumyldyrylyp otyr.