Álıhan Smaıylov jylý berý maýsymyna daıyndyqqa qatysty pikir bildirdi

ASTANA. QazAqparat – Premer-Mınıstr Álıhan Smaıylov jylý berý maýsymy aldynda qaı óńirlerde daıyndyqty qarqyndy júrgizý kerek ekenin aıtty, dep habarlaıdy QazAqparat tilshisi.

«Jylý berý maýsymynyń bastalýyna 1 aıdan astam ýaqyt qaldy. Jalpy, daıyndyq jumystary belsendi júrip jatyr. Jylýdyń der kezinde berilýin qamtamasyz etý kerek. Júıelik operator «KEGOC» kompanııasy jylý ortalyqtaryndaǵy jóndeý jumystarynyń kestesin bekitti. Alaıda, keıbir óńirlerde bul kesteden keshigý baıqalyp otyr. Keı jaǵdaılarda jóndeý jumystaryn kelesi jylǵa aýystyrý faktileri boldy. Sondyqtan, qys ýaqytynda osy obektilerdiń turaqty jumysynda táýekelder týyndaýy múmkin», - dedi Á. Smaıylov Úkimet otyrysynda.

Premer-Mınıstrdiń aıtýynsha, Temirtaý, Rıdder, Ekibastuz, Jezqazǵan qalalary men Mańǵystaý oblysy táýekel aımaǵynda.

«Problemalardy sheshý úshin Qazaqmys, Ortalyq Azııa otyn-energetıkalyq kompanııasy, ArselorMıttal Temirtaý kompanııasynyń basshylarymen jáne ıelerimen kezdesýler ótkizý qajet. Olardyń obektileriniń kópshiligi sýyq erte túsetin soltústik aımaqta ornalasqan. Sondyqtan, daıyndyq jumystaryn kúsheıtý kerek», - dedi Úkimet basshysy.

Onyń sózine qaraǵanda, elordada bıyldyń sońyna deıin JEO-3 jáne 2 gaz týrbınalyq stantsııasyn josparly iske qosýdy qamtamasyz etý mańyzdy.

«Óńirlerde 13 myńnan astam avtonomdy qazandyqtardy daıyndaý qajet. Naqtyraq aıtsaq, 11 myńǵa jýyǵy nemese 81 paıyzy daıyndalǵan. Almaty, Jambyl oblystary men Shymkentte jumys qarqyny jetkiliksiz», - dedi ol.