Álıhan Smaıylov: Jumyspen qamtý servısteriniń barlyǵyn tsıfrlandyrý qajet

ASTANA. QazAqparat – Jumyspen qamtý servısteriniń barlyǵyn tsıfrlandyrý qajet. Bul týraly Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Biz turaqty jumys oryndaryn kóbeıtýge kúsh salýymyz kerek. Ol úshin tsıfrlyq tehnologııalarǵa súıený mańyzdy. Memlekettik organdardyń júıelerin tolyq ıntegratsııalaı otyryp, jumyspen qamtý servısteriniń barlyǵyn tsıfrlandyrý qajet. Otbasynyń tsıfrlyq kartasy, Elektrondyq eńbek bırjasy men Jumys oryndaryn qurýdyń ıntegratsııalanǵan kartasyn biriktirgennen keıin, jumyssyz júrgenderge elektrondyq habarlamalar arqyly vakansııalar usynýǵa bolady», - dedi Premer-Mınıstr.

Úkimet basshysy jumyssyzdarǵa ótinish jazbaı-aq bos jumys oryndaryn usyný mańyzdy ekendigin basa aıtty.

«Mundaı qyzmetterdi smartfon arqyly qoljetimdi etý qajet», - dedi Álıhan Smaıylov.