Álıhan Smaıylov: Jetisý oblysynda qurylystyń joǵary dınamıkasyn saqtaý qajet

TALDYQORǴAN. QazAqparat - Jetisý oblysyna jumys saparymen kelgen QR Premer-Mınıstri Álıhan Smaıylov óńirdiń birqatar ınfraqurylymdyq, ónerkásiptik jáne áleýmettik nysandarynyń jumysymen tanysty, dep habarlaıdy QazAqparat.

Úkimet basshysy qalada 1981 jyldan beri jumys istep turǵan «Basqýat» qazandyǵynyń jumysyn tekserdi. Qýaty shamamen 200 Gkal/saǵ bolatyn qazandyq búginde:
- 500-den astam kóp páterli jáne 1 000 jeke turǵyn úıdi,
- 20 mektepti,
- 25 balabaqshany,
- 10 aýrýhanany,
- 90 ákimshilik ǵımaratty jylýmen qamtamasyz etip otyr.

Sonymen qatar Taldyqorǵandaǵy qurylys jumystarynyń qarqyny men jyl saıynǵy júktemeniń ulǵaıyp kele jatqanyn eskere otyryp, qazandyq qýatyn saǵatyna 300 Gkal-ǵa deıin arttyrý jáne obektini gazǵa aýystyryp, jańǵyrtý josparlanyp otyr.

«Qazandyqty gazǵa aýystyrýdyń mańyzy zor, bul ónimdilikti jaqsartyp, ekologııalyq máselelerdi sheshýge aıtarlyqtaı úles qosady. Oblys ákimdigi joba boıynsha jumysty jedeldetýi kerek. Úkimet óz tarapynan qajetti kómek kórsetedi», — dedi Úkimet basshysy.

Odan keıin Premer-Mınıstr kabeldik-ótkizgish ónimi túrlerin shyǵaratyn «Taldyqorǵankabel» kásipornynyń jumysymen tanysty. Zaýyt óz ónimderin Qazaqstannyń barlyq óńirlerine, sondaı-aq Ázerbaıjan, Qytaı, Qyrǵyzstan, Polsha, Reseı, Ózbekstan jáne basqa da birqatar elge shyǵaryp otyr.

Taldyqorǵandaǵy shaǵynaýdandardyń birinde Álıhan Smaıylov halyqtyń áleýmettik osal toptaryna jatatyn azamattar úshin salynǵan 60 páterlik turǵyn úıdi aralap kórdi. Úkimet basshysy 2022 jyldyń qorytyndysy boıynsha oblysta qurylys jumystarynyń kólemi 4% astam óskenin atap ótti.

Sapar barysynda Úkimet basshysy Aqshatoǵan aýylyndaǵy jańa feldsherlik-akýsherlik pýnktiń jumysymen tanysty. Onda bıylǵy qańtar aıynan bastap jergilikti turǵyndar medıtsınalyq kómek pen ekpelerdiń negizgi túrlerin ala alady.
Aldaǵy úsh jylda óńirde taǵy 118 alǵashqy medıtsınalyq-sanıtarlyq kómek nysany, onyń ishinde «Aýyldyq densaýlyq saqtaýdy jańǵyrtý» ulttyq jobasy aıasynda 59 medıtsınalyq nysan ashý josparlanyp otyr.