Álıhan Smaıylov Jambyl oblysyndaǵy ınvestıtsııalyq jobalarmen tanysty

ASTANA. QazAqparat – Premer-Mınıstr Álıhan Smaıylov Jambyl oblysyna jumys sapary barysynda «EvroHım-Qarataý» JShS iri hımııalyq kesheniniń qurylys jobasymen jáne «Taraz hımııalyq parki» AEA bazasyndaǵy jańa ınvestıtsııalyq jobalarmen tanysty, dep habarlaıdy QazAqparat Úkimettiń baspasóz qyzmetine silteme jasap.

Búginde óńirdiń ónerkásip salasynda 838 kásiporyn jumys isteıdi, al jumyspen qamtylǵandar sany – 43 myń adam. Bıylǵy 7 aıdyń qorytyndysyna sáıkes oblysta óndirilgen ónim kólemi 510 mlrd teńgege (+7,8%) jetti.

«EvroHım» kompanııasy aýqymdy ınvestıtsııalyq jobanyń birinshi kezeńin júzege asyrdy: taý-ken kesheniniń bazasynda jylyna 660 myń tonnaǵa deıin fosforıtter óndirý jolǵa qoıyldy. Qýattylyǵy jylyna 640 myń tonna ortasha usaqtaý jáne usaq untaqtaý qondyrǵysy salyndy.

Investıtsııa kólemi – $126 mln.

Ekinshi kezeń sheńberinde mıneraldy tyńaıtqyshtar shyǵaratyn hımııa kesheniniń qurylysy bastaldy. Óndiristik qýattylyǵy jylyna keminde 1 mln tonnaǵa jetedi. Ekinshi kezeńdi júzege asyrý $1 mlrd-tan astam tikeleı sheteldik ınvestıtsııa tartýǵa jáne 1 200 jańa jumys ornyn ashýǵa múmkindik beredi.

Premer-Mınıstr Úkimettiń hımııa ónerkásibindegi jobalardy júzege asyrýǵa úlken kóńil bólip otyrǵanyn, sondyqtan jańa iri zaýyttyń óńirdiń ǵana emes, jalpy respýblıkanyń damýy úshin de mańyzy zor ekenin basa aıtty.

«Bul jobany iske qosý aýyl sharýashylyǵy salasynyń qajetti mıneraldy tyńaıtqyshtarǵa degen suranysyn tıisti deńgeıde qamtamasyz etedi jáne qosymsha jumys oryndaryn ashýǵa múmkindik beredi. Sondyqtan ishki jáne syrtqy naryqta suranysqa ıe ónimdi tezirek shyǵarý úshin zaýytty ýaqtyly iske qosýdyń mańyzy zor», – dedi Álıhan Smaıylov.

Ári qaraı Álıhan Smaıylov Shý aýdanynda ornalasqan «Taraz hımııalyq parki» arnaıy ekonomıkalyq aımaǵynyń qyzmetimen tanysty. Sonymen qatar Premer-Mınıstrge «TAS Market» JShS-nyń ónerkásiptik kremnıı, grafıt elektrodtary, polıkremnıı jáne kún batareıalary óndirisi jolǵa qoıylǵan kremnıı klasterin qurý jónindegi ınvestıtsııalyq jobasy tanystyryldy. Sondaı-aq «Qazaq Soda» JShS júzege asyryp jatqan elimizdegi kaltsıılendirilgen soda shyǵaratyn alǵashqy zaýyt qurylysynyń jobasy tanystyryldy.

«Biz bul jobalardy qoldaımyz jáne jetispeıtin ınfraqurylymdy tartý boıynsha jumystardy jalǵastyratyn bolamyz. Muny bir jyl ishinde iske asyrýǵa bolady. Indýstrııa mınıstrligi men QTJ-ǵa tıisti tapsyrma beremin», – dep túıindedi sózin Álıhan Smaıylov.